暗影魂 2007-8-21 17:28
邊D星座鍾意高調拍拖？
邊D星座鍾意高調拍拖？
高調派*
白羊女
白羊女最鍾意講光明磊落，再加上佢覺得做得自己男朋友的都有返咁上下，既然係咁梗係要畀各位街坊老友過下目等大家羡慕下啦！所以呢，無論男方點諗都好，佢都一定要玩高調，話畀全世界知呢個靚仔係我，請勿觸摸！梁詠琪係咁，連日本代表阿木村個老婆工藤靜香都係咁！
巨蟹女
相對起白羊女，巨蟹女鍾意玩高調的主因唔係同示威有關，而係類似拎個保用証咁，佢會有意無意之間畀各位知道呢個人係我個男友，請大家自重，更加好的發展就梗係男方向各位街坊做埋愛的承諾果隻啦！佢唔會多講但係會以行動曬幸福！呢，咪就係好似阿郭羡妮咁囉！
人馬女
人馬女一向最鍾意炫耀，當佢男友正到不得了就梗係一定要畀大家睇下啦！白羊女同人馬女都係鍾意炫耀，不過人馬女果種炫耀係同拎住個靚手袋冇乜分別，佢主要炫耀的係個男友有幾靚仔，而唔係玩曬幸福果隻，所以你見到劉嘉玲每次都會著到靚一靚，然後再捥住個朝偉。
雙魚女
比起前幾位姐妹，雙魚女的高調方法係最唔同：佢唔鍾意孖埋個男朋友一齊高調，而係鍾意高調唱畀外界知道佢同呢個人係一pair，然後響Ｄ適當時間蒲一蒲頭，平日就只會響個男朋友身上掛個寫上自己個的名牌，即係好似當年邵美琪咁，佢唔會成日開口埋口講，但係人都知佢男友係鄭伊健咁囉！
中調派∼
雙子女
呢位小姐就較為飄忽，佢玩唔玩高調就真係好睇佢果輪的心情，公開等大家追問下佢又覺得好玩，如果對方要玩地下情偷偷摸摸又會令佢覺得別有一番好玩的風味喎！所以玩唔玩高調就真係睇情況同埋睇撞著邊個，段段玩法都唔同！就好似呢期最紅的李嘉欣同張柏芝都係，要睇下側邊Ｄ人點反應！
獅子女
你咪以為一向生活高調派的獅子女連拍拖都鍾意玩高調喎，其實剛好相反，對戀愛認真的佢，一拍起拖就會變成旁若無人，基本上佢只會花心意響男朋友身上，仲邊得閒理你班友，不過如果身邊果位老友鍾意玩高調出下風頭，咁佢又唔係太介意陪佢，你睇下王菲同鄭秀文就知啦！
處女女
基本上處女女其實係屬於高調的，不過佢Ｄ高調就有Ｄ另類。處女女唔介意公開自己的另一半，亦都有蒲癮將另一半掛響咀邊成日提住，不過呢，冇事冇幹佢又唔係太鍾意將佢帶出來見街坊，所以呢嚴格來講只能夠稱為中調派！陳慧琳咪就係代表囉，係人都知男友係邊個，不過好少見佢會一齊曝光之嘛！
天秤女
老實講，天秤女響呢Ｄ事件到就較為被動，針對佢本身呢，佢又冇乜立場話高唔高調，只係因為佢成日傻頭傻腦，再加上處理得唔係太好，攪到成日惹埋Ｄ閒言閒語，本來唔想高調，旁邊Ｄ３姑６婆都幫佢炒到高調晒，有Ｄ無辜！好似鄧麗欣咁，對於自己Ｄ緋聞都冇乜意見，但係大家就好多意見咁囉！
水瓶女
最後輪到水瓶女，佢係屬於一時高調一時底調，咁幾時高幾時低呢？其實好簡單，佢鍾意講又或者要借外人把口講Ｄ訊息畀佢男友知果陣，佢就會不停講不停講，你唔問佢都講；但係當佢覺得冇乜必要果陣，你畀錢佢都唔睬你，十問九唔應，你睇阿嬌同楊千嬅就知啦！佢要講直頭唔駛你開口！
低調派∼
金牛女
金牛女思想傳統，對於自己的感情事佢唔覺得要公開畀其他人知道，再加上佢本身係穩陣派，唔鍾意大家問長問短，所以較傾向等到雙方感情好穩定至畀大家知，甚至乎有Ｄ會去到談婚論嫁階段先至公告各方好友！你睇下林憶蓮同邱淑貞咪就係一個好例子囉！由拍拖同結婚佢都秘秘密密咁！
天蠍女
唔駛講拍拖，連屋企人或者其他私人事務，佢都唔鍾意講多幾句，話知你係出於八卦定係關心，佢剩係鍾意八外人Ｄ事，講人就開心，只要有少少痴到佢Ｄ私事佢都黑面。所以話，無論對方幾鍾意高調都好，一同佢拍埋一齊，你就咪旨意可以玩高調，你睇下阿SA就知道啦！
山羊女
你知山羊女某程度上做乜都鍾意玩低調，佢講實力嘛！就算講到感情事都係，佢唔係咁鍾意做SHOW畀人睇，其一係因為佢唔慣；其二當然係因為佢覺得冇乜著數！同天蠍女唔同的係佢唔會去到黑面反面咁極端，不過佢會詐詐帝會轉話題囉！你見廖碧兒對住Ｄ緋聞都冇回應就知啦！