[星座命理] 咩星座人同人合作好易反面？【已閱至#1】

白羊座

白羊座會同合作拍檔反面的比率係一半一半，主要係睇下同佢合作果個人係咩人，如果拍檔係個好無所謂，較為鍾意遵從人意見類型呢，鍾意話事做大佬但係好識照顧人的白羊座會令你倍感安心；但係如果拍檔都係好有主見的話，兩個硬碰硬，結果？唔駛講都知道啦！


金牛座

金牛座為人敦厚體貼，唔鍾意同人爭執吵鬧，對住呢位和平大使，就算大家工作起來意見分歧，只要坐低傾掂佢，雖然金牛座係好頑固，但係為免傷和氣通常佢都會讓步，唔會輕易同人反面，所以基本上如果唔係迫佢同蝦佢得太過分，佢同人合作都好少會反面收場！


雙子座

講到同雙子座合作，好少會反面收場，又唔係話合作快冇事喎！應該係話未去到反面的階段，而係合作冇耐就覺得好難一齊工作，係未曾反面已拆夥！雙子座份人好鬼自我，再加埋佢d神經質，有咩事就喜怒形於色，同佢合作真係慘過睇女友面色，所以好快就會同拍檔因了解而分手！


巨蟹座

基本上巨蟹座係唔多希望會同人反面，不過事實係大部分情況都係佢畀拍檔甩，原因係巨蟹座係冇可抗拒咁去照顧人，就算個拍檔有幾難頂佢都會抱住偉大的母愛精神忍住，但係久而久之拍檔就會產生一種覺得有冇佢存在都唔緊要的諗法，最後索性唔預佢做落去！


獅子座

數到獅子座呢，佢係一係唔拍檔，拍得檔就絕少會反面收場，原因當然同金牛座唔同，係人都知獅子座份人又專橫又霸道，成日以為世界係圍住佢轉，全世界的人都係因佢而生，唔理係唔係熟人佢都會係咁，佢d性格咁鮮明都會同佢做得拍檔，所以合作落去反而冇問題！


處女座

唔駛多介紹都知道講到最易同人拆伙的星座十居其九都實有處女座份！無錯，處女座係出晒名鍾意挑剔人，成日以為自己永遠是對的，又鍾意指指點點叫人做事，同佢做拍檔冇返咁上下忍耐力要忍佢半日都難！不過一旦你忍得做佢拍檔其實處女座做生意又勤力又靠得住！


天秤座

如果唔計工作能力，基本上呢位超級和平主義者同人拍檔工作反面的機會係好微，佢同金牛座都係好注重人與人之間的和諧，而且天秤座再畀金牛座更加無所謂，雖然佢響某一d地方都會好執著，不過佢的性格始終係屬於柔和派，要游說佢認同你的睇法拎個共識絕對唔難！


天蠍座

係人都知天蠍座係出晒名的機會主義者，只要佢覺得你對佢有用佢自然會引你入局同佢合作，呢個階段佢對你乜都話得，到佢將你榨乾榨淨之後，佢的真面目就會慢慢浮現，到時你講乜佢都唔再理你，冇利用價值時你唔同佢反面，佢都會主動同你反面踢走你！


人馬座

同天秤座相似，如果唔講工作能力，以人馬座呢種與世無爭，唔鍾意同人鬧交的性格，同人合作反面的機會較細，好多時候佢都會好尊重拍檔的意見，但係當拉埋工作能力來講，以佢貪玩又懶做、又冇乜責任心的人生態度呢，又唔係真係個個拍檔頂得佢順！


山羊座

山羊座係個絕對事業型戰鬥民族，同事業工作有關的事情佢就會特別心水清，佢只要聞到同你合作有成功的味道，佢就一定會死咬住你唔放，比天蠍座更厲害之處係佢的忍耐力驚人，而且佢眼光非常好，佢鎖定你對佢有用佢點都唔會同你反面，係個手段高超的背後領袖！


水瓶座

水瓶座工作態度好認真，又唔怕捱，仲好鍾意將d工作攬晒上身做，同佢做拍檔就梗係開心啦！不過合作得耐又會覺得始終唔係咁了解水瓶座諗緊乜，對於果d疑心重的拍檔來講始終冇乜安全感，不過講到尾水瓶座為人屬於柔和派，同人反面拆伙離場的機會唔係咁大！


雙魚座

另一個拆伙反面機會低的星座，雙魚座其實唔係大方，佢都幾小器，不過講到底佢都係屬於敢怒不敢言尤其係對住拍檔呢種自己人，就算有幾唔滿意最後佢都會用忍字訣，久而久之大家的關係亦都因為咁而得到平衡，唔介意個拍檔傻頭傻腦但同人易夾的就記住優先考慮雙魚座啦！

[ 本帖最後由 雨子.oo. 於 2012-10-5 23:06 編輯 ]