校徽擋邪救人一命
本文來自：☆夜玥論壇ק★http://ds-hk.net★ 轉帖請註明出處！ 發貼者：
暗影魂 您是第839個瀏覽者
回歸前每一個警察帽上正前方都有一個英國皇冠標誌。有人話呢個皇冠徽章唔單只係一種身份象徵，當遇著鬼怪時，皇室徽章仲會保護配戴者，有驅鬼的作用。其實每一個學生都有呢種護身符，就係學校的校徽。
「做乜無情情件校服要加塊咁o既o野上去呀？唔記得戴又話要記缺點，真係煩！」今日係游飆轉𨪛呢間教會學校讀中四o既第三日，新入學基本上冇乜問題，除o左校服上面額外要扣上o既鐵校章比較煩之外，一切都順利。
「游飆你又唔見o左個校章呀？其實你返屋企除低個校章之後，即刻放入書包咪唔會唔見囉！我咁耐都未試過唔見，你返o左三日學之嘛！就唔見o左三個，因住買校章買到窮呀你！」Tony係原校生，坐於游飆隔籬，三日之間佢o地已經成為最好傾o既朋友。
「我以前o個間學校都唔知幾好，淨係著套校服就掂，邊有咁麻煩蕂！仲要成廿蚊個！賺死佢！」游飆o係度自言自語。
其實游飆讀呢間學校o既鐵校章設計好簡潔，圓形、紅底、上面大大個十字架，下面有幾個字o既校訓，唔會比一個一蚊銀大，外型唔算靚，不過賣廿蚊就好似貴o左少少。
「不過你記唔記得頭先去學生會買校章o個陣，o個個人叫我o地一定要戴個章呀？話好有用喎！唔通戴o左去打機有得平？」Tony笑笑口話。
「我問喇！好鬼荒謬！」原來游飆之前買校章o既時候，學生會負責賣o個個同學同佢講o左一個校章o既故事。
原來呢間學校曾經發生過一宗意外。
十幾年前有一個汽水公司o既送貨工人，於送貨落地牢小食部o既時候，由於貨物太重，一箱箱o既罐裝汽水跌晒落樓梯，o的o野壓住一位路過o既老師，呢位老師被壓至下半身癱瘓，最後仲自殺身亡。自此之後，好多學生都唔敢一個人行經呢條樓梯，仲有人話o向o個度見過位老師。
有一次，一個中一學生唔知死，放學後一個人落去小食部買汽水。當佢買完汽水，諗住上樓梯o既時候，突然見到前面樓梯上面，有個人面向小食部企o向度。個學生以為呢個係老師，所以都企埋一邊諗住俾佢過先。點知o個個人就咁企o向度唔郁，個學生覺得奇怪，於是抬頭望𣈳係邊位老師。一望之下，那位老師竟然成面都係血，而且仲好似想伸出手埋去掂佢。不過當佢兩隻流晒血o既手想搭住學生兩邊膊頭o個陣，突然俾一陣強光射到彈開兼隱形！個學生耷低頭，見到原來o的光係o向自身上o既校章，過程就好似拍電影咁，校章上面o個個十字架突然發出一陣好強o既光，就係呢陣光將包個血淋淋o既老師嚇到成個彈開。呢個學生之後就將經歷同老師同學講，跟住就有同學講返俾佢知o個位血淋淋o既老師，應該係之前意外中死亡o既老師！可能佢想叫學生行樓梯時小心，但係就俾校章發出o個陣光嚇到消失。
後來有學生跑去問老師校章點解咁神奇，有位宗教科老師就講，原來校章上面，係一個發緊光o既十字架，亦都代表神，可能就是意外中死亡o既老師接近學生，神顯現佢o既大能保護呢個學生。
「嘩！咁戴住個校章仲方便過袋住本聖經喎！」游飆衰衰咁話，然後就上課室上堂。
幾日之後，游飆留o向學校直到成六點先走，由於學校同屋企距離好近，所以每次佢都會行路返屋企。今日個天雖然已經開始黑，但佢仍然諗住行。返屋企o既途中有一段係大直路，平時都冇乜人行，只係耐唔耐有巴士駛過。游飆今日一如往日邊行邊戴住耳筒聽歌。突然間佢感覺到好似有人在後面叫住佢，「游飆！」由於唔你太肯定，所以游飆立即除低耳筒聽多一次。
「游飆！」真係有人叫自己喎，把聲仲好似好熟。
於是游飆即刻擰轉個頭諗住睇o下邊個叫佢，點知擰轉頭之後竟然發覺根本冇人。不過竟然又有把聲叫佢「游飆！」，呢個時候游飆終於覺得自己應該遇到唔乾淨o既，佢根本唔知仲應唔應該再擰轉頭好……突然間佢諗起幾日前聽過包個鬼故！記得好似話校章可以驅鬼，於是佢拿拿臨於褲袋坃出俾自己除低o既校章，然後將成個校章向前推一推之後再擘大眼；游飆果然見到前面企著一個面色比菜更青o既中年男人，根本冇生命o既感覺，就好似傳說中o既彊屍咁！不過佢一見到個校章後就即刻掩住對眼向後走，然後仲消失埋，剩低嚇到呆晒o既游飆o個度。
自此之後，游飆返學o既時候，第一件事就係戴返校章，就算放o左學都會將個校章袋o向袋度。
你讀o既學校有冇校章？如果有，你就幸運喇！因為你分分鐘都有神射住射住。
