標題: [現代都市] [轉]《時間》 (作者:細佬~) [打印本頁]

---

作者: 無名    時間: 2006-10-24 11:52     標題: [轉]《時間》 (作者:細佬~)

(1) 暗戀也很快樂

我是子行。

自小已經知道自己跟許多人不一樣，我不喜歡異性，我只對男孩有感覺，但因為「他」，我從來也沒有談過戀愛。

他叫家俊。跟他認識了不經不覺也已經有五年了，他跟我性向一樣，只愛男孩。你或者會問我，既然如此，為什麼我到現在也沒有跟他開始？我會答你，可能我不是他想要的那種人吧！總之他給我的感覺是「我跟你是永遠沒可能的！」。但是，我卻不自覺地喜歡了他，這份情竟也維持了長達五年之久。

對！ 這叫做 "暗戀" ，最愛情中最不見得光的一種戀愛，亦是最傻最沒可能的一種。但我卻覺得很快樂，只要我能看見他，在他身邊盡力地令他開心，我便滿足了。縱使他每次帶新男友與我見面，我的心便會有一點點的隱隱作痛，但只要能愛著他，我覺得已經很足夠了。這是我和他的生活方式，一個大家也習慣了的生活！

畢業後，他說想跟我一起搬到外面一起住，我想也不想便答應了。從此他的起居飲食便由我一手包辦，我總會處理得井井有條。起碼令他滿意吧！

這是我唯一可以做的．．．也許這才能表達我的心意吧？

-------------------------------------------------------------------------------------------------

我是家俊。

我是一個不折不扣的同性戀者，典型的人馬座，主動而多情，所以我身邊總不缺伴侶。同時，我也有一個很要好的朋友，他叫子行。

跟他認識了五年，五年當中他對我的態度總沒有變過，他永遠總是屈就自己來讓我快樂。起初我也不覺得有什麼問題，但到最後我終於明白了這是什麼的一回事，不斷的付出令我肯定了一件事──他愛上了我。

要是讓別的男孩愛上我，我不跟他一起才怪。唯獨是他，一定不行，我知道我不是一個好人，亦不是一個好男友。我不想因為我這混帳性格而害了他。也許我有天會改變吧，至少不是現在。所以我已盡量想辦法令他死心。我知道這會令他很痛苦，但總比跟我一起的痛苦輕。

但無可否認，他真的很照顧我，跟他一起住，我可以稱得上生活無憂。但這令我有點內疚，因為我的回報，只會是狠狠地傷他的心。

---

作者: 無名    時間: 2006-10-24 11:52

(2) 痛

我是子行。

家俊轉換男友的頻密程度，可以比得上電影院轉換新戲的時間，每次只不過是大約一個月，而最多的也不會超過兩個月。而他的前度男友的名字，幾乎可出以湊出一本英文名字的字典來，由 A 至ｚ也試過。今個星期，家俊又換了新男友了，今次的叫做 Dominic，是一個很嬌小的男孩，個子矮小，眼睛大大的，是一個很可愛的男孩。

當然，他每次有新的男友，也會把他帶上我們家，所以我絕對是見過他的每一個前度。想不到今次家俊的口味又轉了，還記得上次的那一個 Clement，比我還要高一個頭。一身肌肉的粗獷型男仕，是那種可以很容易地便能抬起你的那種人。

"喂，子行，我番黎啦" 家俊拖著那個男孩回來。
"你番黎啦？我今日勁開心......" 我從房中飛奔出來，本想告訴他我今日所發生過的事情，但我看見那個男孩，便停了下來。 "你.......朋友呀？"
"係呀，呢個係 Dominic "他指指身後的男孩。"呢個係我管家兼死黨，子行。" 家俊向我指了一指，然後故作親密地抱著我說 "佢包晒我 d 飲食架，如果唔係我邊得咁大隻.... 係呢，今晚有乜食呀"
"淨係顧住食，你招呼下人地啦。" 我故作自然地跟他說。 "我去煮飯啦。"
"我入房 "照顧" 下佢呀，食得飯嗌我啦， honey。" 他一臉輕挑地說。
"知啦....你好核突呀..."我裝出一個嘔吐的動作。
房門關上後，我輕輕地嘆了一口氣。

家俊，其實你知不知道，每次看到這個情況，我也很痛，心很痛。

------------------------------------------------------------------------------------------------

我是家俊。

又有一個新男友向我投懷送抱了，這是一個小男孩。一定要把他帶回家，讓子行見見他吧。

半刻意地拖著那男孩的手 "喂，子行，我番黎啦"
還未踏進門，便已聽到一把聲音由房內傳出來 "你番黎啦？我今日勁開心......" 但來到我面前時，明顯地是硬生生把說話吞回肚內。
我知道他很介意的，看他的臉色便可得知，其實不用看，也知道他的語氣上那種裝出來的鎮靜。
經過一輪自我介紹後，我便把那男孩帶進房內，但我卻清楚地聽到，子行在關上房門時那深深的嘆息。

"佢係你個 friend 咋？" Dominic 一進門便問。
"係呀，有咩問題呀？"
"佢係咪唔鐘意我呀，點解佢見到我果陣面色都變埋既？"
"冇呀，你睇錯咋。"
"如果佢唔係唔鐘意我，咁就只得一個可能性"
"咩呀？"
"佢鐘意你囉！"
"嗯...... 唔好亂講啦，而家最重要既係..... 搞你！"
"哈哈.... 唔好搞啦，救命呀"

難道真的那麼明顯？連一個毫不知情的人也能看得出？

子行，你不能愛上我的，真的不行。


(未完待續)

---

作者: 無名    時間: 2006-10-24 11:52

(3) 藉口

我是子行。

我有一個週期性的循環：見他的新男友 -> 很痛 -> 慢慢適應了那個人 -> 沒有那麼痛了 -> 知道他分手 -> 安慰他 -> 再見他的新男友 -> 又再痛過.....

又是一個新開始了。雖然是沒有心情，但也許是為了禮貌，又或者是為了他，我亦必須要裝出一副滿不在乎的樣子去吃這餐。

"喂，出黎食飯啦" 我向著房門大喊。
"得啦。" 裡面的人應道。
五分鐘後，他們倆臉帶笑容地走出來。
"唔好意思呀，我唔知你上黎，我冇準備到你果份呀，你唔介意我開罐頭架呵？"我嘗試打開話匣子。
"唔緊要，我唔介意架。Sorry 呀，我上黎冇通知你。" 他似乎是一個有禮貌的孩子。
"你駛乜預佢丫，佢上黎自然有其他野食架啦。"家俊一面邪惡地說。
"嗯....."
"嗯....."
我跟 Dominic 同時無言以對，可見 Dominic 的臉飛快地紅了起來，而家俊也知道自己說錯話，連忙說 "食飯啦，多野講。"

其後我們三人也沒太多說話，這個氣氛剛好能掩飾我的神不守舍吧！
飯後，我說了一個謊話。我說我約了朋友，今天晚上不會回家，之後便急急忙忙地出了門口，根本不讓家俊有機會問我任何問題。

其實，我除了他之外還可以有什麼朋友？我只不過用一個藉口去給他們一個獨處的空間而己。那天晚上，我買了數罐啤酒，在附近的公園坐了一整晚......

--------------------------------------------------------------------------------------------------------------

我是家俊。

當我正抱著 Dominic 時，聽到子行在出面叫我們 "喂，出黎食飯啦" 把所有氣氛也打亂了。
"得啦。" 我只好應道，之後便稍稍整理我們的衣裝才出去，免得子行有所誤會。
一會兒後，我們走了出門外，看見子行一個人在桌前呆呆的。
我們坐下後，便聽見一輪客套說話。
"唔好意思呀，我唔知你上黎，我冇準備到你果份呀，你唔介意我開罐頭架呵？"
"唔緊要，我唔介意架。Sorry 呀，我上黎冇通知你。"
為了打破這僵住了的氣氛，我試圖說笑 "你駛乜預佢丫，佢上黎自然有其他野食架啦。"
"嗯....."
"嗯....."
看見他們二人也不說話，心知不妙。難道我真的沒有製造氣氛的天份？
結果，在結束這一餐前，大家也沒有再說太多話。

飯後，子行說他約了別人，還急急忙忙地走了，不知道他約了誰呢？
慢著，除了跟我們玩開的那一班，他有比較熟的朋友嗎？如果他們約了子行，沒理由會不叫我的。

三小時後，我藉故到了附近看看，真的給我在公園看到他，拿著罐啤酒在發著呆。
算吧，既然他不想給我知道，便由得他吧。

(未完待續)

---

作者: 無名    時間: 2006-10-24 11:53

(4) 17 歲男孩

我是 Dominic。

我叫 Dominic，我也有個很土的中文名，叫做李家樂，太土了，令我不想提起它。至於 Dominic這個名字，便要多得一個人，這個人，令我初次接觸「同性戀」這個名詞，這個世界。

還記得當年15 歲，我還在學校就讀中三。就讀男校的我，不知怎地經常惹來大眾的眼光。再時常有些學長來搭訕，我在學內經常能得到不少好處。而其中有一個叫 Donald 經常對我很好，常常和我一起吃飯，不出三個月，我們的關係已經曾進了不少。

有一次我到了他家裡過夜，他竟要求抱著我睡，忽然間他吻了我一下，還問我想不想做他的男朋友，我竟然想也沒想就答應了他。雖然那夜與他什麼也沒有發生過，但從此以後他改變了我很多。包括我的名字----- Dominic，他說這是由他的名字改變而成的。

但這只不過是他玩弄我的一切，三個月後，他忽然要跟我分手，原因是他一直有令一個男朋友，而跟我一起純粹是為了新鮮感.。我很記得他跟我說的最後一句------“你知唔知愛係咩呀？”

為了他的一句，我決定要去尋出這個答案。

在icq 內，我不斷地周圍問其他人同一個問題，直至遇到家俊，我想我終於有機會知道愛是什麼了。

“hello 我叫家俊呀，你叫咩名呀？” ICQ 傳來這個聲音。
“我叫 Dominic呀” 我懶懶地回答。
“send 張相黎睇下丫”
“嗯.....咁快？” 我對這個人有點兒厭惡。
“唔send呀? 咁你有冇 bf 呀?”
“冇...” 不是吧？那麼快便問我這些。
“咁好？咁我咪有機會囉？你想要咩type既bf呀？”
“下...對我好囉...令外,我中意囉”
“咁我咪一定得？”
“唔知架........ 睇下點先啦！ 其實我想問你一條問題，咩叫愛呀？” 我又問同一條問題了。
“愛......就好似食糖咁，你可以唔食，但係當你食左第一粒之後，你會忍唔住想再食，開頭係好甜好甜呀，但係食得太多，你就一定會痛！” 他答得很奇怪，令我對他的反感一掃而空。”不過呢，時間都好重要，唔0岩timing，粒糖幾好味都唔關你事，哈！俾我做你粒糖啦。” 他又回復輕佻的性格。
“你就想.....” 敗給他了。
我們就是一直吵吵鬧鬧，不過世事難料......想不到這樣的開始到最後竟然可以令我倆走在一起！這些已經是後話了。
(未完待續)

---

作者: 無名    時間: 2006-10-24 11:53

5) 占卜

我是子行。

他們不經不覺也一起了兩個多星期，因為習慣了他們在我面前的行為說話，也因為 Dominic 給我的感覺良好，我也慢慢沒有了那種不快的感覺。

Dominic 上來我們家的次數也越來越頻密，就好像他已經搬了來我們家似的，和他相處落，也不覺得有什麼問題。他們有他們的明戀，我還是繼續我的暗戀，我們三個人便這樣下去。

我是一個小報記者，我負責的是報導那些新奇、奇怪的事物。因此每天也能接觸許多不同的人，亦能看到很多事情。今天我要採訪的，是一個有很多人也覺得靈驗的占卜師。

還以為那占卜的地方會是陰森可怖的，但它卻位於鬧市中的一個人流最多的地方，而店內竟以銀白色來佈置，與我的想像中有很大的出入。此外，店主更是一個妙齡少女，看起來年紀比我還要小。

當我完成了那個訪問後，她便跟我開始閒聊了。
"多謝晒你今日俾我訪問呀。"
"野就做完啦，你有冇興趣占個卜先？呢個送既，唔收你錢啦！"
"咁我就唔客氣啦，多謝先喎。" 難得來到便玩玩吧。

她那出一副塔羅牌，抽出數張，之後把它排好在桌上，之後續一把它們翻。
“咦？你暗戀緊人。”她看到第一張牌後說。
“嗯........”
“但係呢，佢唔會同你一齊。但係之後你好快會有一個機會，你會接受佢架。不過呢，果個人既出現會對你現有既生活造成一個好大既轉變。你未必會覺得開心，不過呢..... 到最後你係會同你真心鐘意果個人一齊。”
"即係點呀？"我狐疑。
"有好多野都係靠你自己架咋，呢 d 占卜都係幫下你，唔可以信到十足十架。呢度有幾張紙，都係對人既愛情金句黎架，你抽張啦。而家可能冇用，但到有事發生果陣，你便會覺得有用架啦。"
我抽了一張，打開來看，上面寫著 "時間是一段愛情中，最重要的部份，只要時間吻合，兩人便可以走在一起，如果時間不對，縱使有緣，亦會無份。"

--------------------------------------------------------------------------------------------------------------

我是家俊。

今天 Dominic 特別好興致。
"喂，家俊，我有個 friend 話呢，有個神婆好勁架，不如我地又去玩咯。"
"咩黎架？"
"塔羅牌占卜呀。"
"咦！咁無聊，唔好啦。"
"唔好啦，黎丫，陪我去丫。"
看到他撒嬌，縱使沒興趣也要去，真受不了他。

來到那店舖前，看到那充滿 cyber feel 的裝修，我不禁說了一句 "準唔準架佢？"
"入去啦，我 d friend 話勁準呀，傻佬。"
"你地好，諗住一齊定分開占呀？"一個年輕少女招待我們。
"不如分開占啦，你地老闆娘呢？"我問。
"我咪係囉。"她說。
"你係？"我跟 Dominic 感到難以致信，想不到她那麼年輕。
"乜我真係唔似咩，個個都咁覺得添，算啦，開始啦。"
她用了很短時間，便替 Dominic 占了，結果又是那些他有如意的愛情之類的東西。
最後她叫 Dominic 抽了一張金句，上面寫上 "分離永遠是痛苦的，所以在別離之前，請好好享受愛與被愛，享受每個相愛的一天。"

到我占卜了，她排了數張牌出來，之後把他們翻開。
“你而家同時俾唔止一個人鐘意緊，你身邊可以有好多選擇。不過好快你身邊就會有一樣好重要既野會離你而去，因為咁你會 down 好耐好耐，不過你到最後應該可以有個團圓結局架。”
"係.....咩？"我問。"咁我可以點呀？"
"有好多野都係靠你自己架咋，呢 d 占卜都係幫下你，唔可以信到十足十架。呢度有幾張紙，都係對人既愛情金句黎架，你抽張啦。而家可能冇用，但到有事發生果陣，你便會覺得有用架啦。"
我抽到的是 "時間是一段愛情中，最重要的部份，只要時間吻合，兩人便可以走在一起，如果時間不對，縱使有緣，亦會無份。"
好像有點不好的兆頭。
走後，Dominic 問我 "你占成點呀？我好準呀。"
"車，都唔準既，不過你鐘意，無所謂啦，去邊度食野呀？"
"你話事啦..... 老公" Dominic 每次這樣叫我也是臉紅紅的，真的很可愛。
順手把那張金句放在錢包內，便與 Dominic 去吃晚飯了。

---

作者: 無名    時間: 2006-10-24 11:53

(6) 新朋友

我是子行。

今天本來我的假期，本來準備好好的弄一餐給他們吃，當我正在醃肉時，突然報館來電，說約了一個很難才約到的人做訪問，他今天少有空，但臨時找到人去採訪，問我去不去。

這是假期時的額外工作，基於那可觀的額外報酬，我把這工作接了下來。幸好 Dominic 也懂得烹飪，臨行前留低一張字條，叫他們把東西煮熟便可以了。

這次是一間售賣最新玩意店鋪，店主是一個高高的男孩子，樣子清秀，比我年長一兩歲，普普通通的，不過令人印象難忘。
"自我介紹先，我叫子行，我是 XX 日報記者，今次係想訪問下關於你鋪頭 d 野架。"
"你好，我叫 Jimmy，呢間鋪頭頭仔既老闆。"
"你生意好忙架？聽我老細講你好難 book 時間架喎"
"都幾啦，得我一個人搞嘛，係咁架啦。"
"咁你都幾叻喎，係呢，關於果個最新......."
半小時後，終於把工作做完了，我在店內到處看看。
想起家俊說過，很想要一隻玩偶。

"我想知呢，有冇最新果隻公仔呀？"
"邊隻？"
"我要見到先知喎，我唔係好識架，我幫個 friend 問問咋"
"形容黎聽下啦。"
"個頭圓圓地，兩隻眼好大架，不過個樣好傻果隻呢。"
"哦，我知你講邊隻啦，我睇睇先....... 而家冇貨喎，一係你留低電話，有果陣我搵你啦。"
"我留手提俾你丫，因為我唔俾得我個 friend 知架，想嚇餐飽既佢呀我。"
"不過，如果未有貨果陣，我以一個 friend 既身份搵你得唔得先？"
"當然得啦，不過我第時黎買野要有折架喎。" 我笑著說。
"你鐘意我送俾你都得。" 他一臉認真地說。
"講笑咋。" 我說。"走先啦， byebye Jimmy，遲 d 見。"
"bye"

真好，又認識了一個新朋友。

--------------------------------------------------------------------------------------------------------------

我是家俊。

昨天子行還興致勃勃地說今天放假，還說要弄一餐給我們吃。但當我們回到家時，卻看見他在桌上留下了一張便條。
" To 黃家俊伉儷 :
小弟今日有野要做，份糧好筍架，本來話左整野你地食，點知而家要反口 lu~~~ 鬼叫我睇錢仲重要過你地咩。
不過呢，我唔係咁絕既，你地今晚要食果 d 野，我搞好晒架啦。 Dominic 你識整野食架啦？整熟晒 d 野就搞掂架
啦，我唔知今晚幾點先會番架，你地兩個人慢慢燭光晚餐啦。
by 子行 "
"咁點算好呀？" 我問 Dominic。
"我去整囉，如果唔係點喎...." 他答道。 "不過，你要幫我手架。"
"知道，我負責係你身後面攬住你啦。"
"咁你唔好過黎啦....罰你坐"
"唔好啦，俾我丫~" 我學著他撒著嬌說。
"好核突呀你，幫手拎 d 野出黎啦。" Dominic 裝出一副厭惡的樣子。

當晚，子行很晚才回來，進門時他的笑容怪怪的，很像有些什麼秘密似的，問他又不回答。似乎有古怪。

---

作者: 無名    時間: 2006-10-24 11:53

(7) 生日禮物

我是子行。

我正在埋頭苦幹時，電話忽然響起。
"喂，你係咪子行呀？" 一把陌生的男聲。"我係 Jimmy 呀"
"…..係係，點呀？" 差點兒忘記了他。
"你上次話想要果隻公仔呢，有貨番啦，你幾時得閒呀？"
"咦？有啦？唔該晒你呀，今晚得唔得？"
"好呀，不如一齊食埋飯先啦，好唔好？"
"咁好啦，我收工過你鋪頭搵你啦。"
"我等你呀， bye"
"好啦，byebye"

少有地我很爽快地把所有應該完成的工作做好，然後就乘的士到 Jimmy 的店鋪了。
"拿，係咪呢隻呀？"
"嘩，係佢啦係佢啦，唔該晒你呀，幾錢呀我俾番你啦。"
"唔使啦，就當我地見面禮物啦。"
"唔好，話埋隻公仔我係送俾人架，如果我唔俾錢好似唔係咁好既。"
"咁呀......多謝先啦。" 他收下那些錢。 "呢隻公仔你送俾個好重要既人架？咁緊張既。"
"嗯..... 都算幾重要啦。佢話想要呢隻公仔好耐架啦，我咪諗住撲到咪買俾佢當生日禮物囉。好彩趕得切今日有咋，佢今日生日呀。"
"女朋友？"
"唔係呀，男仔黎架。"
"睇黎你地交情都幾深喎。"
"嗯...... 係呀，都識左佢五年幾啦。"
"咁唔怪得之啦，你幫我祝佢生日快樂啦。"
"好呀，我代佢多謝你先。"
"係呢，去邊度食飯呀？記者仔，你應該知好多好地方架喎。"
"咁呀..... 附近有間新開既法國菜館，你去唔去？我請你啦，為左多謝你幫左我咁多。"
"好呀，咁多謝晒你喎。"

在吃飯時，我們又在閒聊，談很多關於大家的事情。
"其實你有冇鐘意既人架？" Jimmy 忽然間這樣問我。
"嗯......有呀。"我答道。
"咁你又唔同佢拍拖？" 他又問。
"唔好啦，我明知同佢一定冇可能架啦。" 我說，語氣中帶了點感慨。
"點解架？" 他追問。
"因為佢永遠都唔會愛上我架。" 我答。
"咁又唔一定既，可能大家 timing 唔岩咋。" 他說。
"Timing 唔岩極都五年啦喎。"我衝口而出。
"下？" 他眼光中帶點疑問地看著我。
"冇野，我傻左者，唔駛理我。"我慌忙掩飾著說。
"咁你有冇諗過搵過第二個？" 他又問。
"未有咁諗住呀，都遇唔到，可能係我冇去搵過掛？" 我唉了一聲。
"如果再有機會，你會唔會去試下？" 他問時帶了點試探的語氣。
"到時先算啦。" 我不知怎樣回應。
"咁又係。" 他答，接著我們又繼續用餐。

回到家中，我剛踏進門口，就聽見家俊跟 Dominic 在房中的調笑聲，我輕嘆一聲，把那隻布偶放在他們的房門口，便回到我自己的房間了。

關上門後，我問了自己一句 "究竟係咪真係唔岩 Timing 呢？"

--------------------------------------------------------------------------------------------------------------

我是家俊。

今天是我的生日，在這個生日前夕，我要與我的現任愛人------ Dominic 一起過，我要他伴著我渡過今晚，我要他成為在我生日中守在我身邊的人。

本來還想找子行一起去玩的，好讓我在這些重要的日子能左擁最愛的人，右抱最好朋友的人。但他在今天臨近下班時，忽然間打電話回來給我們，說今天晚上約了別人吃飯，不回來陪伴我了。語氣間還帶點神秘，好像有真的有些什麼在隱瞞著似的。

有點不慣的感覺，在這幾年的生日，就算我在那時有沒有戀人，我也會跟子行一起過，但今年是我認識了他後，第一年沒有他的生日。

"生日快樂呀老公。" Dominic 一臉甜絲絲地說，之後他那出一隻手表。"呢隻表我儲左幾個月食飯錢先買到架，希望你會鐘意啦。"
"我一定鐘意架，不過你下次唔好再浪費錢買呢 d 野啦知唔知呀，餓親你呀，我會心痛架。"
"只要你開心，我就夠架啦。"
聽到這句，我立即送上一個深吻，以報答他。
"最衰子行今日唔係度啦，如果唔係我就真係咩都有啦。"
"........" 我看到 Dominic 眼中有點不快。
"做咩呀？"
"冇野......."
"你唔鐘意我提起子行？"
"咁又唔係既。"
但從他的眼神中，我看到一些東西，叫做醋意。
"我最愛係 Dominic，我願意一生一世都愛你。" 希望會令很放下一些不快吧。
"我都愛你。" 幸好能令他高興點。
"我餵你食蛋糕丫老公。" Dominic 拿了件蛋糕，送到我口邊。
"唔知點解，你餵果 d 特別甜架。"我逗他說。
"你口花花啦。"
"食完蛋糕啦喎，我要第二份禮物....." 我陰笑地說。
"咪俾左你囉，你仲想要咩呀？" Dominic 問。
我站起來把關鍞上，之後再忽然把 Dominic 一把抱起，說 "我要...... 你呀。"
Dominic 被我按在床上，他欲拒還迎地掙扎著說說" 唔俾......"
我不給機會他說任何東西，因為他的唇已經被我封住了。

不知過了多久，當我把房門打開時，一隻布偶應聲掉到我的腳旁。原來是我說了想要很久的那一隻。

不用說也知道是子行買給我的，但以我所知在香港很難找到這一隻布偶的，但最近這樣忙碌難道是為了找這隻布偶給我？

本想跟他談談，但他的房門是關上了，還是不要去煩他了。

---

作者: 無名    時間: 2006-10-24 11:54

( 8  )  表白

我是子行。

認識了 Jimmy 也差不多一個月了。最近常常跟 Jimmy 一起出來玩，有時是我約他，有時是他約我，總之我將最近的假期全部奉獻了給他。

我們有時會遊覽一些平時沒有太多機會會去的地方，例如一些離島，又或者香港一些奇怪的景點。有時候我們會到國內，作一兩天的短期旅程。要不是他，我也不知道在香港原來有很多地方我是沒有去過的，也因為他，我每一個假期也過得很充實。

而家俊他們不經不覺也一起了兩個多月了，他們不但一點分手跡象也沒有，還越來越恩愛，看起來這一次家俊他對 Dominic 是認真的吧！

而我也常常跟 Jimmy 和他們朋友們一起玩，我也漸漸融合了他們的圈子內。有一晚，我跟他們去喝酒，Jimmy 今天晚上好像特別高興似的，喝得特別多。

忽然間他向我說出一些令我很震驚的說話。
"子行，你驚唔驚我呀？"
"我點解要驚你呀，你睇下你，唔好飲啦。"
"其實我 gay 架，你會唔會避我呀？"
"傻啦，我都唔 mind。"
"你唔好扮..... 扮野啦，根本你都係一樣。"
"嗯......" 我無言以對。
"其實我..... 好鐘意你架，不如你同我一齊啦。"
"你飲大左啦，唔好講埋晒 d 衰野啦。"
"我講真架，我張文熙好鐘意李子行。"
"嗯..... 我送你番屋企啦，行啦。"
"你接受我好唔好呀？"到了家門口，他問我。
"我番去先啦，你自己抖下啦。"之後我便急急忙忙地走了。

回到家中，看見家中少有地只得家俊一人。
"咦？今日得你一個咁奇蹟既？"
"Dominic 佢要考試嘛，所以呢排都唔會過黎架啦。"
"哦...." 之後我便回想剛才 Jimmy 的說話。
家俊看見我的情況，便問我 "你冇事丫嘛？一番黎就呆晒咁...."
"下？冇野呀。" 我回答。
"你呃到我咩？有野你就講啦。" 真逃不過他的眼神。
"其實........"

--------------------------------------------------------------------------------------------------------------

我是家俊。

子行今天一定有問題，他一回到家便呆呆的，跟他說話也只是一句起兩句止，我要了解他究竟發生了什麼事。

"你冇事丫嘛？一番黎就呆晒咁...." 我問他。
"下？冇野呀。" 說完後他便繼續發呆。
"你呃到我咩？有野你就講啦。" 他那表情，一看便知道有問題。
"其實........咁多年黎，你知唔知我對你點架？"終於要解決這個問題了。
"你覺得我會唔會唔知丫？"
"我知你知架，咁你其實當我係咩架？"他看著我說。
"朋友囉。"
"你對我一 d 感覺都冇？"
"無可否認，有。但係我都知道，我唔可以愛上你。"
"點解呀？"
"因為我唔想傷你呀，老實講，我拍咁多次拖，都唔係好知乜野係愛。係我搞清楚之前，我都唔可以愛上你。"
"我唔介意架。"
"我介意呀，我唔想見到你俾我 hurt 果個樣呀。我特登帶 d boyfriend 番黎係為左令你死心呀。我唔想你繼續落去，你明唔明呀？"
"我知呀，但係我控制唔到呀。" 他作出一個想哭的樣子。
"我想你開心呀你知唔知？"我問他。
"我知道。但係我想問你一樣野，如果而家冇 Dominic，你會唔會同我一齊？"
我想了很久。答道"唔會。"
子行唉了一口氣，再說 "如果我有機會同第二個人拍拖，咁你會點呀？"
"我會好贊成你去。"
"咁.... 咁就得啦，我明啦。" 他一臉不高興的說。
"仲有，我信我同 Dominic 會長久架。因為我真係好鐘意佢，我都唔知點解。" 我補充一句。"我同你做朋友好過啦，咁樣先一定可以一生一世嘛。"
"咁.....我同你仲係朋友啦？"子行問。
"梗係啦，你仲要煮好多好食既野過我食架。"我說笑。
"我知啦。"
"咪住先，你話如果有機會拍拖，咁即係你而家就黎有機會啦？邊個，快 D 講！"我轉換話題。
"Jimmy 囉.... 佢頭先唔知係咪飲大左，話鐘意我喎。"
"乜原來佢都係 gay 架？" 我問。
"我唔知呀，係掛。" 子行答。
"如果佢係都唔錯丫，人又幾靚仔，又有錢又有鋪，去馬啦。"說著我輕拍了子行肩膊一下。"你咁靚仔，實溝死仔架。"
"邊夠你靚仔。"他笑說。
"肚餓呀我，小行子快 d 同朕準備晚餐。" 我裝出一副皇帝的模樣。
"喳。"子行還跟我扮起太監來，之後還忍不住笑。"嘻嘻嘻......"

終於解決了這個問題了，希望子行能找到他的幸福吧！

---

作者: 無名    時間: 2006-10-24 11:54

(9) 接受

我是子行。

跟家俊表白後，我似乎領悟了什麼。既然他要我學懂去放手，我便姑且跟去找些機會吧。

之後，我跟 Jimmy 也越來越親密了，見他的時間可能比和見家俊更多，我現在也只叫他做阿熙了。但今天，他又跟我再重提那次的舊事。
"子行，其實我真係好鐘意你架，我果次雖然係飲醉酒, 但係我同你講果 d 野句句都係真架。"
"點解又咁講呀？我地而家做 friend 喎好咩？"
"我認真架，你可唔可俾個機會我同你試下架？"
"咁...... 其實你講唔講得出，你鐘意我 d 乜呀？"
"其實我第一眼見到你果陣，我已經對你有好感架啦，但係我唔肯定你係唔係，所以我唔俾自己咁諗，但係當我知道你同家俊 d 野果陣，我就已經估到你都係member。所以我決定左要追你。至於點解我會鐘意你，係因為我覺得你係好難得既一個人，可以對另一個人死心塌地左咁多年，都冇鐘意過第二個人，咁樣絕對係一個好既 lover。我認我一開始見到你果陣，係一見鐘情，係為左你個樣。但係到我清楚晒你份人之後，我知道我自己唔係淨係鐘意你個樣咁簡單，我鐘意既係你既全部。所以我同自己講，我唔可以放手。而家，你當係俾個機會大家，俾你試下令自己放手，亦俾個機會我去愛你啦。"
"嗯..........."我沈默了一會兒。
"你唔接受我呀？"他有點失望地問。
我想了一回，之後叫他閉上眼睛。
"家俊，係你叫我試下接受第二個架。我聽你話架啦。" 之後我便輕輕的吻在阿熙的唇上。
他的眼神由失望變成驚喜，之後抱著我歡呼。差點便要跳起舞來。
“你講得0岩，我係應該俾個機會大家，但係，你要記住.... 係呢一刻我唔係全心全意咁鐘意你，如果你要同我一齊，你一定唔可以介意我心入面仲有一個人，得唔得呀？”
“得得得..... 我咩都應承你！”阿熙抱著我說。

自此，少了一個人暗戀著我，不過同時得到了我的第一個男友。

------------------------------------------------------------------------------------------------------------------------

我是文熙。

我佷高興。只因為子行終於肯接受我，做了我的新男友。當然，我很愛他。

不過，因為我明知道子行跟家俊的關係，亦知道他們之間的故事，同時子行亦明言他心內會有家俊的存在，而他們又生活在同一屋簷下，作為男朋友的我，一定也會有些擔心。

以防萬一，我作了一個決定，這個決定我不知道會否做成什麼影響，但起碼會令我感到安全一點。

---

作者: 無名    時間: 2006-10-24 11:54

(10) 改變

我是子行。

一切如常，家俊知道了我的跟阿熙的戀情後，只要隨便的應了一聲，沒有太大的反應，不過對我們有興趣的反而是 Dominic，他常常也嚷著叫我帶熙出來。

阿熙知道我跟家俊一起住，而他也知道我們之間的事情，我一向以為他不會很介意我跟俊住在一起，只不過．．．．．．事實卻沒有那麼如意。

發生在今天晚上，當我正跟他正吃著日本料理的時候。
當我正想把一件三文魚壽司放進口時，阿熙跟我說 "阿行呀, 不如你搬咯。"
"下？點解呀？" 我停止了手中的動作。
"我想你搬過黎同我住囉，咁我可以日日見住你囉。"
"你唔好話我睇穿你，你唔想我仲同家俊住埋一齊之嘛。"
"你知就好啦。"
"你 mind 呀？"
"......."
"咁呀......都好既.....你星期六上黎我度食飯啦，個小朋友話想見你喎。"
"都好，咁我當你應承左我架啦。"

心中雖然答應，但叫我怎樣跟家俊開口呢？

--------------------------------------------------------------------------------------------------------------

星期六晚上。

今天是子行帶文熙回家見家俊他們的日子。不過，子行心中卻不覺得特別興奮，反而有點兒擔心。

子行在早上已經把文熙接了回家，而在下午時家俊回來，一輪介紹後，大家便靜了下來氣氛有點兒尷尬。

由於今天的廚師仍然是子行，所以他們進了廚房。在切切炒炒時，他決定了。有些東西，還是要直接些去表達的好。

那種尷尬的氣氛，一直到 Dominic 到來後才有所改變。
"你就係 Jimmy？真係幾靚仔喎，唔怪得子行會鐘意你啦。" Dominic 興奮地說。
"你一定係 Dominic 啦，叫我阿熙得啦。" 文熙說。
“喂，聽講你好大膽去追子行喎，你咁都得，唔怕衰左好瘀架喎。”
“哈，咁我估到佢係架先講啦，唔驚俾人打呀？”文熙開玩笑地說。
之後他們東拉西扯地談著，氣氛才慢慢融洽起來。
"家俊呀..." 子行忽然間說。
"做咩事呀？" 家俊問。
"遲 d 叫 Dominic 搬埋黎住好唔好呀？"
大家的動作忽然間停了下來，氣氛又開始緊張起來。

"點解 Dominic 要搬過黎呀？" 家俊不明所以。
"我想搬啦。" 子行吸了一口氣，然後說道。
"住得好地地做咩要搬呀你？" 家俊問。
"阿熙想我過去佢度一齊住呀，仲有，有時 Dominic 上黎，我係度阻住晒始終都唔係咁好既。"
"你冇阻住我地呀，唔好搬啦。" Dominic 說道。
"之前一向係咁都相安無事，點解而家先話有事？" 家俊問。
"以前冇地方嘛，仲有，我過阿熙度住，番工方便 d ，得閒又可以幫佢看舖喎，幾好丫。" 子行頓了一頓，繼續說 "唔駛怕喎，阿熙會照顧我架嘛。仲有，屋租果方面唔駛擔心，我會繼續同你 share 一人一半架。"
"唔係屋租既問題呀..... " 家俊說。
"次次都係我聽你話，俾次聽我話得唔得先？我決定左架啦" 子行問家俊。
"嗯...... 既然你都決定左咯...... 你幾時搬呀？" 家俊說。
"下星期啦。" 子行說。
“哦...咁你到時叫我幫你手啦。我飽啦，Dominic 你陪我落街行下。”

一頓晚餐就這樣大家不歡而散。

--------------------------------------------------------------------------------------------------------------
我是Dominic。

從來未看過家俊發那麼大脾氣。
“你冇事丫嘛...... 好地地做咩要發脾氣喎？”我問家俊。
“我冇發喎，咁食飽飯想去行下之嘛。”
“你睇下你個樣啦，咁都唔係發脾氣，你擺明係唔鐘意子行搬走啦。”
“你..... 唔好亂講，我冇咁諗......只不過我唔鐘意佢講得咁急，唔通知我”
“你話咩咪咩囉..... 咁老公仔你而家係咪真係飽丫，頭先冇乜見你食野喎。”
“見到你仲食得落咩？肥仔∼∼“
“我都叫肥？唔係呀？我呢d俾阿媽話我可以拎去乞錢架喎......”
“咁你想食乜丫？乞錢.....”
“你認你肚餓呢？都話你架啦，哈哈哈，我 Dominic 大少係勁啦。食 m 記！”
“知你勁啦，買開心樂園餐俾你好冇？”
“你話架，呵呵∼食到唔開心既開心樂園餐你就知死。”
“多謝你呀，如果唔係你tum下我，我諗我真係會大把野諗。”
“知我好啦咩？仲成日恰我。”
“得啦，以後錫晒你一個好唔好？”
雖然明知道這不會是一個真實的承諾，但我還是不自覺地答一句 “好！”
--------------------------------------------------------------------------------------------------------------
我是家俊。

一星期過去了，子行終於要搬走了，同時 Dominic 真的搬了進來。

"過到去小心 d 呀，有咩打俾我啦。" 我跟子行說。
"得啦，你都係呀，同 Dominic 住得開心 d 啦。" 子行回答。
"ok 啦， bye"
"拜拜啦。"

我不是很捨不得，但不知怎地，心中始終有種患得患失的感覺。

"老公，我住子行間房？" Dominic 問我。
"唔得！" 我呼喝他。
"唔駛咁惡既....."
我自知失言 "對唔住呀，我唔係鬧你呀。你就梗係訓.... 我張床啦。"
"哦......."

到最後，子行的房間始終是空了出來。因為我覺得他一定會回來，回來他自己的房間。

---

作者: 無名    時間: 2006-10-24 11:55

(11) 分手

我是家俊。

子行也搬了個多月了。不過我始終還是有點不習慣，最近，還有點神不守舍。

今天是星期日，我跟 Dominic 在家中。
"子行，無晒即食麵啦喎，你聽日去買番黎啦。" 我查看廚櫃欴後說。
"下？" 換來的是 Dominic 的聲音。
"Sorry 呀，我叫錯添。" 我心知不妙。
"........."
"做咩呀？我唔係有心架。"
"你唔習慣丫嘛，我知架。"
"唔好咁啦，我下次唔敢啦。"
"唉....." Dominic 輕唉一聲。
"唔好唔開心啦，喂喂。"
"知啦，我冇野喎。" Dominic 笑了一笑說。

--------------------------------------------------------------------------------------------------------------

我是 Dominic。

其實我開始跟家俊一起的時候已經知道有子行這個人了，只不過因為家俊說他不會喜歡他，所以我不覺得有問題。

況且，我很清楚家俊的情史，所以我有機會可以跟他拍了幾個月拖，已經代表我是特別的。而且，我也很喜歡他，所以，一直以來我也覺得今次我們一定會長久的。

可惜，事實上不是這樣的。

自從子行搬走後，他已經常是神不守舍的。經常跟我提起子行這樣子行那樣，還有時叫錯了子行的名字。起初我只不過認為他是不習慣子行搬走了，但自從有一次他連跟我一起睡時仍叫著子行，我就發現事情沒有那麼簡單。

"家俊呀，不如我地分開下啦。"
"點解呀？" 他緊張地問我。
"因為我地之間有問題。"
"有咩問題呀？"
"子行。"
"關佢咩事？我都話左同佢冇可能架啦。"
"你太掛住佢啦，本來我都以為你係唔習慣，但係你知唔知你果次同我咩咩...... 果陣你叫住邊個呀？"
"......"
"其實你一路都係鐘意佢架，只不過你唔肯亦都唔敢認之嘛。"
"我...."
"算啦，我同你分開下啦好唔好？就一個月好唔好？到時我地再決定仲可唔可以一齊啦。"
"點解要咁喎。"
"呢段時間入面唔該你自己好好諗清楚你鐘意邊個啦。你份人係要迫架，一定要去到鐘意既人全部離開你果陣，你先會知道自己最著緊邊個。如果你到果陣都仲係鐘意我既，我一定會同番你一齊，但係你一定要對我真心真意，但係如果你揀子行既.... 我都唔會唔開心架。"
"咁..... 我地大家冷靜下啦，”
“我想而家就搬番自己屋企住架啦..... 你會幫我架可？”
“我知道啦，咁我幫你搬番屋企啦。"

其實我搬來的時候沒有帶太多東西來，所以即日便可以回家。

"老公。"
"做咩呀？"
"臨走之前俾我鍚多你一次得唔得呀？"
"唔..." 之後他便吻了下來。

明知道今天一放手便沒法回頭，但是我又怎能去繼續喜歡一個不是一心一意愛我的人呢？

---

作者: 無名    時間: 2006-10-24 11:56

(12) 分手後

我是 Dominic。

其實自從我搬離家俊的家後，我已知道我跟他是再也沒有可能在一起了。

“你都傻既，好男人就梗係死捉住佢唔好放啦，我係你就冇咁蠢還番俾人啦，愛情呢家野，邊個有能力 keep 到佢就嬴架啦，讓俾人既仲係愛情咩？”說話的是我的好友kevin，他為我的大方抱打不平。
“咁....... 我唔可以咁自私架嘛.... 佢地至係真正既一對，我只不過係佢地之間既一個第三者。”我呷了一口我最愛的蜜瓜奶昔。
“你係咪咁天真呀？咁如果個個都係咁，你又讓俾人既，咁你一世都冇仔啦？你有冇為自己諗過架？有時都唔知話你大方定係白痴好啦。”他沒好氣地說。
“唉......我唔知我咁做係唔係0岩，但係我淨係知道如果我唔咁做，我都唔會安樂架。”
“唔知你呀，咁你而家點呀想？”
“番屋企住一排先啦，如果一個月後，佢仲係唔捨得我既，我一定會番去架！”
“你唔係仲諗住佢會番黎呀？你咪癲啦！”
“咁冇可能都係一個可能黎0者.......唔代表一定架喎。”
“唉，唔理你啦！”

我決定再去占一次卜。
“咦？又係你呀？今次你個朋友呢？”年輕少女問。
“佢..... 唔得閒黎呀，今次我想占一次同佢既關係。”
“好，你照番上次咁啦。”開牌後，她凝視著牌面，然後說。“你同佢之前有一段好甜蜜既關係，但係你地之間仲有一個人既存在，而家係地係處於一個分離既狀態，但係結果.....”當她翻開最後一隻牌時，她停了下來。
“點呀？我同佢會點呀？”
“嗯.........”她欲語還休。
“其實.....係唔係唔好架？”
“你同佢好好珍惜啦，不過凡事退一步，睇開 d ，對大家都會好 d，雙方面都會開心好多架。”
“其實我一早知道個結果，只不過我說服唔到自己去接受呢個事實呀。”
年輕女孩忽然間看著我，眼光像看穿我的一切似的，然後說。“你唔係放唔開，其實，只不過可能係你既心唔想去放開，呃住你自己，令到你自己以為自己真係放唔到手，你試下啦，你一定可以。”
“但係，我唔可以冇左佢呀。”
“傷心，係在所難免架，但係，冇傷心既痛，又點會學得識開心既喜悅呢？”
“可能你講得冇錯既......”
“你拎去啦，呢個係愛情符，佢一定會保佑你有一段美滿既愛情架。記住，你有既係時間，唔好令自己既時空停留係一段唔係屬於你既關係入面啦。”
“多謝你呀，我諗我明架啦，呢度係＄１００。”
“算啦，我收平d你啦，當係因為我同你好傾啦。”
“多謝晒你呀。”
“希望你明白我講既野啦。”


我是kevin。

我是阿樂的同班同學，我們本來不知道對方是同志，只不過在某一次在酒吧遇見，才知道的，因此我們的感情突飛猛進，可能是因為大家很少這圈子的朋友，在校內同病相憐吧！

他跟那個什麼家俊的事，我知得一清二楚。其實我真係不值他的所為，換著是我，我一定不會拱手相讓，反正是那個人沒有表白，這是跟我沒有關係，我是不會委就自己來成全別人的。

不過算吧，他就是這樣的一個人，永遠只會為別人著想，縱使被人欺負了也豪不作聲。

“你知唔知你咁樣好蝕底架？成日都係咁俾人搵笨。”他搬離那個家俊的家後的某一天，我跟他提起了這事，「順便」責罵他說。
“是但啦，佢開心咪得囉。”他永遠就是這樣傻乎乎地說。
“唉，你呀，好鬼擔心你囉，你一ｄ都唔識保護自己。”
“咁，你黎保護我囉，好唔好丫？”他開玩笑地問。
“好呀，你係咪俾我保護先？”我答道。
“傻啦，你都唔會鐘意我啦，我咁醜樣，又咁零喎。”
“唔係架，我鐘意你架，你不如做我男朋友啦。”
“嘩，你講笑都好真喎，咪玩啦死野。”
“哈哈哈，我當你係細佬咋，鬼叫你咁得意”（其實你又知唔知......假話中永遠也帶著幾分真？）
“快ｄ買野食俾我，人地阿哥。”
“係既......”

既然沒有這個心，我也只好把這份感情收起來吧。

---

作者: 無名    時間: 2006-10-24 11:56

(13) 頹廢

我是子行。

今天如果我可以做完這些工作，我便可以有一個一星期的假期，否則我在假期內也要工作的。

當我正在埋頭苦幹著，電話忽然間響了起來。

"喂？"
"子行呀？陪我一陣得唔得呀？" 聲音有點沙啞。
"家俊？做咩事呀？我唔係好得閒呀。"
"Dominic 飛左我啦。"
"做咩搞成咁架？" 我聽後有點愕然。
"佢話我同佢之間有問題喎。"
"下..... sorry 呀，我今日一定要做完呢 d 野架，不如我遲 d 再 call 番你丫。"
"咁...好啦。"
"你唔好咁唔開心啦... 喂我有野做啦，放工先打俾你啦，好忙，bye。"
"拜拜。"

--------------------------------------------------------------------------------------------------------------

我是家俊。

原來我沒有太多知心朋友的，我唯一能夠傾訢的對象，是子行。
"喂？" 又聽到這把熟悉的聲音。
"子行呀？陪我一陣得唔得呀？"
"家俊？做咩事呀？我唔係好得閒呀。"聽到他背境是一連串的打字聲。
"Dominic 飛左我啦。"
"做咩搞成咁架？"
"佢話我同佢之間有問題喎。"
"下..... sorry 呀，我今日一定要做完呢 d 野架，不如我遲 d 再 call 番你丫。"
"咁...好啦。"
"你唔好咁唔開心啦... 喂我有野做啦，放工先打俾你啦，好忙，bye。"他說完俾匆匆忙忙地掛線。
"拜拜。" “嘟......嘟......嘟.....”
聽著電話裡的嘟嘟聲，我才發現子行已經變了，現在連他也不再理我了，從前無論他有多忙，他也會聽我說的。

子行？Dominic？我的心內只是不斷地出現他們兩人的樣子，究竟我愛的是那一個？還是......
其實頹廢可以算是一個人在傷心時的止痛藥，什麼也不去想什麼也不去做，到頭來卻可令自己有個機會去鬆一口氣。可是，頹廢到最後卻變了一個令自己放縱的藉口，
“橫掂我都諗唔掂我可以點做，倒不如出去玩.......咁樣反而係好 d，我要變番做以前果個黃家俊。”

反正工作已經不太重要了，上班亦不過令我擁有更多時間去胡思亂想，不如辭掉算了。

每一晚我也可以找到一個新認識的人跟我一同去各大小酒吧，而且同行的伴侶也沒有重覆過，更甚至陪我進去的是這個，當我離開時，我已認識了另一個更好的了。

我已經由從前的短期戀愛變成現在的 one night stand。不過，始終心裡還有人，這些行動只不過是給自己一個理由去忘記自己要面對的事。但原來，要面對的;還得去面對。應該是說，有很多事情還是有轉機的。

有一天，不知為何，我患上了一場大感冒，但奈何家中無人，迫不得已還是找了子行上來。

子行知道我病了，便立刻來我的家。
“嘩，你做乜搞到咁呀？" 他一進門看見我的模樣便說。
“都冇人理我，點都得啦。"
"你即刻番上床訓啦。" 他命令我。
半小時後，他送了一碗粥跟藥來。
“食完粥好食藥啦，之後訓啦。"
“你呀，一唔睇住你就搞到咁。" 他說。
“我冇野架。"
“你為左 Dominic 搞到咁？"
“唔係呀......不過，我最近識左好多人......"
“one night stand？”
“嗯.........”
“唉，你做咩要咁喎.....”
我答不上來，只好閉口不語。

我吃了後，便睡在床上，他來替我蓋被。忽然間我看到子行送給我的那隻布偶，我發現一切也清楚了。
“子行...”
“做咩呀？”
“你嬲我之後同出面d人發生既野呀？”
“冇呀......不過你唔應該咁做之嘛。”
“sorry 呀，我知我咁做係唔0岩.......但係到而家，我終於知道，我鐘意果個原來係你呀。”
“我梗係知你鐘意我啦，鐘意我幫你搞掂你生活上所有野嘛。"
“我認真架，唔好當我玩啦。"
“......點解。"
“Dominic 話同我分開既原因，係因為佢想我諗清楚，我鐘意果個係邊個。我到而家終於諗清楚，原來我鐘意果個係你呀，我係鐘意 Dominic，但係果種鐘意唔同鐘意你果一種呀。我拍拖果陣邊個為我唔開心丫？我生日邊個同我周圍撲一隻我隨口話鐘意既公仔丫？我病左邊個即刻黎睇我丫？仲有，我果陣邊個黎照顧我丫？係你呀!!!李子行。我一路都知你對我有野，但係我有太多前科啦，我驚同你一齊會害左你呀，所以我一路都唔敢同你一齊。但係而家俾你咁迫一迫，我終於知道其實你先係我想要果個呀。"
“唔好講埋晒 d 咁既野啦，你自己都知，我同你其實係冇可能架。"
“我知，你有左 Jimmy 嘛。"
“Sorry 呀，當初係你講架，我同你唔可以一齊架。"
“點解？"
“當初我接受阿熙之前，我有問過你架，你都話好我先去，而家你先同我講唔好，咁我應該點呀？"
“....."
“對唔住呀，我真係唔得呀。唉..... 就當我地 Timing 唔岩啦。"
“Timing......唔夾？”忽然間我想起上次占卜時拿的那張紙。
“我地都慣左大家係好朋友啦。"
“咁如果有一日，我地 d timing 又岩番，咁你仲會唔會同我一齊。"
“到時先講啦，將來既野冇人知架。”
“我覺得你一定會同我一齊架。"
“我而家真係答唔到你呀， sorry 呀。”

為了奪回子行的心，我會努力的。


我是子行。

當我知道家俊最近發生的一切，其實我真的很介意，為什麼他口口聲聲說喜歡我們，但卻又去四處找人跟他一夜情呢？只不過，當他說他最喜歡的是我時，那一刻我真的有了動搖。原來..... 我始終都是放不低他。

不過，理智告訴我，我是不可以跟他一起的，因為我有了男友，因為他還有 Dominic，因為.................

---

作者: 無名    時間: 2006-10-24 11:57

(14) 一個月後.....

我是子行。

家俊究竟在想什麼，根本連我自己也不知道。

明明當初是他自己說不會愛我的，但現在卻忽然間跟我說喜歡我。換著是從前的我，我想我會立刻答應的，但現在....... 我已經有了阿熙。我想家俊他是很明白我的性格的，既然我接受得阿熙，我便會對他一心一意的。所以，我不得不拒絕他。

雖然不想自己經常地想著這件事，但我卻常常也想著，只覺得很煩惱。如果我接受家俊，只會是對阿熙不公平，況且我又不能給自己一個理由去支持自已這個想法。但如果不接受他，他只會更加不開心，作為朋友，我也不想看見他這樣。
“順其自然.... 由得佢啦...." 我對自己說。

--------------------------------------------------------------------------------------------------------------

我是文熙。

最近我知道那個家俊跟他的男友分了手，亦知道他乘機向子行表白了。但我不會那麼輕易便把子行送回他身邊的。
我打了個電話到家俊的家。
“喂，你係家俊？"
“你係....."
“我係 Jimmy，我有少少野想同你傾下，你可唔可以出黎呀？"
“好。"

我約了他到附近的一間茶室坐下來。
“你同子行 d 野，我唔多唔少都知 d。"
“咁......"
“你要知道，當初係你唔要佢先。"
“我知... 不過...."
“我地不如照直講啦，你自己知自己事啦，如果你同子行一齊，咪搞到佢唔開心。我知我同你都係好鐘意佢架，大家都想佢開心者.... "
“而家我好清楚自己想要乜野架。"
“你清唔清楚我唔知，但係我唔想你搞住佢，佢呢排為左你已經好唔開心。老實講，我真係好唔鐘意你，對住你我扮唔到友好，因為你傷得我條仔太多啦。最重要既係....佢心入面始終都仲有你呀！"
“我...."
“半個月，好唔好？半個月後睇下大家想點，如果我係 get 到佢仲係鐘意你，我一定會放手。但係我希望你係呢段時間之內唔好再搞住佢，唔好再令佢覺得有任何唔開心，如果唔係我唔會放過你！"
“我知啦，我呢半個月內都唔再俾壓力佢，俾佢自己諗下啦。"
“多謝你。"
“仲有，我地兩個今日講過既野，唔好俾子行知，我唔知佢再諗太多。"
“ok..."

--------------------------------------------------------------------------------------------------------------

我是 Dominic。

我跟家俊分開了後，最多聯絡的，反而是子行，漸漸的，我跟他竟可以慢慢地發展了一段兄弟情。
“佢真係咁同你講呀？" 我驚奇地問。想不到家俊竟然表白了。
“係呀，都唔知佢做乜。"
“我冇估錯，佢真係對你有野。"
“佢病到傻左亂講野咋。" 不用看我也知子行在說謊。
“唔好呃我啦，其實我對左家俊咁耐，佢點樣我會唔會唔知丫。"
“咩事呀？"
“你走左之後，佢已經失晒魂咁，成日叫當我係你。我初初都當佢唔慣啦，但係....."
“做乜呀？"
“佢連同我....果陣都叫錯呀。"
“唔係呀？"他驚奇地說。
“終於我發現自己忍唔到落去，咪同佢分手囉。"
“咁...."
“不過我果時同佢已經約定一個月後大家搵番大家睇下仲可唔可以一齊番，不過其實......呢d都只不過係做下樣架0者.....當我行出果個門口之後，我就知我再唔會係果間屋既半個主人啦。"
“其實我係咪好衰呀？鐘意呢個，但係又對果個有野。"
“唔係呀，咁人地鐘意你唔係你既錯喎，你而家需要既係要認真 d 考慮清楚，家俊定 Jimmy 。"
“咁..... 又係既。" 子行喝了一口飲品，說 "咁你有冇嬲我搶左你男朋友呀？"
“梗係冇啦，你都冇搶到，係佢自己痴埋你度架嘛..... 仲有..... 係我自己唔要架嘛......”喝了一口蜜瓜奶昔，我對他說。“我地係 friend 黎架嘛。仲有，你地有五年做基礎。我輸俾其他人就一定嬲，但係如果輸俾你，我會認輸。"
“你真係好啦， Dominic。"
“如果係真心多謝我就請我食飯啦..." 我裝出一個天真笑臉。
“梗係冇問題。" 子行舒了一口氣，好像放下心來。
“仲有...以後就算你同邊個一齊，發生咩事，都要話俾我知架。仲有鍚晒我喎。" 我老實不客氣。
“得啦得啦，當你係我細佬咁鍚得啦掛？" 子行說。
“好呀..... 多謝阿哥。" 我裝出一副乖巧的表情說。

既然事情發展到這個地步，看來真的要等之後才能解決了。

---

作者: 無名    時間: 2006-10-24 11:57

(15) 不拖不欠

我是子行。

自從那一天後，大家再沒有提起那件事，而我和阿熙一起亦相安無事，不過當我們提起家俊的時候，另一人便會立刻轉換話題。盡量的，我們避而不談他。

而家俊找我的次數也少了，多數也是我找他的，而每次也只是大家出來吃飯，不會有太多談話。

反而跟 Dominic 來往卻十分多，一星期也有數次一起，他似始真的變了我弟弟似的。今天晚上，阿熙到了外國，所以我又找了 Dominic 陪我。
“又搵你食飯啦，細佬。"
“好野，又有好野食啦。"
“點解次次都要我煮喎，下次都係你煮好 d。"
“阿哥你煮飯好食嘛，我邊識喎，我咩都唔識架。仲有你話鍚我架。" 他一面無知地說。
“你都幾無賴架喎，必要時扮細個就過到骨。" 我笑著拍打他。
他一邊閃避，"梗係啦，況且我根本係細個，細得黎仲要可愛呀。"
“....." 我無話可說，唯有轉換話題。"係喎，一個月就過啦喎，你地點呀？"
“有咩點呀？" 他忽然認真起來。
“真係冇得救？"
“睇佢一定唔會同番我一齊架啦。"
“好地地做咩又會搞到咁喎。"
“我都唔知....."
大家相對無言。
“唔好提佢啦，我地食野啦。"
“好.... 好好味呀!!!!" Dominic 一臉誇張地說。
“你扮野丫你，喂，今晚係度陪我得唔得呀？"
“你.... 你唔好亂黎呀，我係你哎呀細佬黎架。" 他作了一個害怕的表情。
“你痴線，你訓廳啦。"
“唔係呀？咁我走啦。"
“唔駛咁現實呀？同我孖鋪啦。"
“咁我會攬住你訓架喎，得唔得架？"
“得既..... 不過小心阿熙番黎殺左你喎... 嘻。"
“佢唔捨得既，我咁可愛。"
“係咩？"

在床上時，Dominic 忽然間說 "其實你覺得家俊點諗架？"
“我唔係好知架咋，一時話冇可能，一時又話好愛我。"
“其實佢一直都鐘意你，但係佢自己唔知，又唔敢受你咋。"
“佢話驚 hurt 我嘛。"
“佢同我講過，有時特登帶男朋友番黎，明知你會 hurt，但係佢想你死心。"
“嗯....."
“仲有..... 你知唔知點解佢咁耐都唔係點搵你丫？"
“點解呀？"
“因為 Jimmy 搵過佢，叫佢唔好搵你住，俾時間大家冷靜諗下喎。"
“點解佢要咁講呀？"
“佢地兩個都愛你，兩個人都唔想你唔開心，所以咁樣等大家清楚大家想點，可能會好 d 掛。"
“唉......."
“咁你想點揀呀？"
“我都唔知呀.... "

--------------------------------------------------------------------------------------------------------------

我是家俊。

“喂，Dominic 呀？出黎一陣好唔好？"
“好呀。"

一會兒後，我又看見這個曾經愛過的人。
“一個月過左啦喎。" 我第一句可以說的話。
“係呀。我地都成個月冇見啦。"
“嗯。咁你諗成點呀？"
“呢樣野你問你自己唔係好 d 咩？" Dominic 仍然保持微笑。
“問我？"
“其實我果陣點解會想分開你知唔知架？"
“我知......"
“其實果陣我已經知道我唔會可以同你再一齊架啦。始終你鐘意果個係子行呀。"
“......"
“加油啦，你追番子行番黎啦。我知佢對你都有野，如果唔係佢根本唔駛煩咁耐啦。"
“但係佢...."
“你慢慢黎啦，佢會心軟架，其實佢個心點諗，你唔會唔知掛？"
“我估我知掛......."
“放心啦，我支持你既.... 我加埋你....一定可以 tum 番佢既。"
“多謝你呀。"
“其實你有冇真心鐘意過我架？"
“一定有！你知我如果係唔鐘意果個人，就唔會同佢長久。你係我拍咁耐以黎最長果個呀。"
“咁就好啦..... 多謝你呀老...呀唔係... 家俊。"
我以一個微笑回報。
“仲有呀，我講個秘密你知丫，其實你係我第一次。" Dominic 紅著臉說。
“我知呀。"
“但係我冇叫痛喎。"
“未必一定痛架，仲有當然係我...技術好啦。" 我以一個邪惡的口吻說。
“咁你點知我第一次架？"
“你 d 動作咁生硬，又驚驚青青咁，一睇就知啦。"
“咁人地緊張嘛...." 他說。”不過多謝你呀。"
“多謝我咩呀？多謝我拎左你第一次？"
“唔係呀衰人，係多謝你同我拍左咁耐拖。我真係學左好多野，我覺得自己真係大個仔左好多。"
“咁咪好囉。你以後小心 d 識人啦，搵個好 d 既，唔似我既。"
“我一定會。不過我想你快 d 同番子行一齊住。"
“我努力架啦。"
“不過呢....... 臨走之前，可唔可以俾我攬多次呀？之後，我就真真正正咁同你冇拖冇欠啦。”
“樂....... 我其實真係好....... 鐘意你，你真係好好呀。”我擁抱著他，在他耳邊說。

聽到他輕輕地飲泣，即是代表我已經完結了跟 Dominic 這半年的戀情。現在，輪到子行的那一邊了。

---

作者: 無名    時間: 2006-10-24 11:57

(16) 想清楚，我要的是誰

我是子行。

"Dominic 你真係唔要佢呀？" 今天我們吃肉醬意粉。
"係呀，唔唔.... 好食好食。" 他帶著滿口肉醬說。
"你咪鬼食住啦，答我先啦。" 我硬把他的頭抬起。
"做咩喎？" 他飲了一口蜜瓜奶昔。
"你捨得架啦？"
"到我唔捨得咩？人地擺明冇可能啦...." 說著他的眼眶紅了起來。"與其夾硬一齊大家辛苦，不如快快手手搞掂佢啦。"
說完他撲到我的身上，哭了起來。"咁我知... 嗦...我知佢鐘意果個其實係你嘛....嗦.....咁咪俾番你囉.."
"點解要做到自己咁辛苦喎....." 我一邊抱著他，一邊安慰他說。
"..嗦..... 你等左五年呀....嗦....我算得係乜...乜喎...嗦...俾我.... 死人都唔會等呀。"
"唔好喊住先啦，好唔好？"
"哦....嗦...知道...."
好不容易，才能令他平伏下來。
"其實你唔應該咁做架知唔知，既然鐘意就唔好放手啦。況且我都有左阿熙啦。"
"你...其實自己一早知道自己想要邊個架。"
"....."
"你唔好呃自己啦，照你心入面果個去揀啦...."
我無言以對。看見他的鼻涕眼淚一臉都是，我隨手拿了一塊碗布給他抹。
"你拎塊爛布去抹我塊可愛既面，破左相點溝仔呀？"
"你死啦你....咪住先。" 我看到自己身上已經沾濕了一片。"用我件衫就抹得架啦？"
"梗係，阿哥件 DKNY 喎。"
"你賠錢呀你。"
"冇錢喎....嘻嘻嘻。"

問心？我會選擇誰？阿熙.... 還是家俊？始終，我都要作出一個決定。

--------------------------------------------------------------------------------------------------------------------------------------------------

我是文熙。

一個月已經過去了。那個家俊似乎要回來找子行的了。雖然口中是說想子行自己選擇，但老實說，怎會有人願意把自己最愛的人雙手奉獻給別人呢？但我想，我還是沒有方法能把子行留住了。

始終，要來的一定會來。

其實我跟子行一起那麼久，除了接吻外，根本沒有再進一步的行為，因為我看見子行好像不太想似的，所以我沒有強迫他。但今晚，他竟然主動向我要求，完事後，他一臉正經地跟我說。
“熙，不如我地分手啦。”
“點解…..”
“我諗得好清楚架啦，我都係想跟家俊多 d….”
“又係因為佢！！！！“ 我開始有點憤怒。 “你明知佢份人係點架啦。”
“我知…… 你就當我犯賤啦。我始終要同佢一齊過先甘心架。”
“咁我點呀？呢個半月黎你同我玩架？” 我有點歇斯底里。
“對唔住呀，不過我可以講我係真心愛你架。”
“咁你要離開我，頭先又同我做？”
“對唔住呀，就當係我補償啦….. 我知我對你唔住，我俾唔到 d 乜野你.... 咁就俾我最重要既你，當係我同你呢段關係之中既一個美好既回憶啦........“
“啪” 我忍不住掌摑了他。 “補償？你竟然咁睇我？我係貪你個人，一早搞左你啦。你講既回憶，對於我黎講，係比死更難受呀！”
“……..”
“你走呀，我而家唔係好想見到你呀！”
“阿熙…….. sorry 呀。”
“唔好同我講野，你走啦。你唔走，我真係驚我會忍唔住打你呀！”
接著他“砰”的一聲揮向大門，子行不得不離開這個地方。

目送他走出這個大門後，我才開始有點後悔剛才的行為，但當我想追回他時，他已經遠離了。我坐在門後，放聲大笑，忽然間笑得眼淚也湧出來…….

---------------------------------------------------------------------------------------------------------------------------------------------------------------------

我是 Dominic。

今晚，心緒不寧，忽然，門鈴響了。
“子行哥哥，做咩咁夜帶埋行李黎呀？”
“俾我住一排得唔得呀？”
“你入黎先啦。” 我看到他右邊的臉頰紅得朣了起來。 “你塊面……”
“我飛左阿熙 lu…… 仲有做左 d 好衰既野，咪俾佢打左一巴囉。”
“你做過 d 咩呀？” 我拿了個冰袋給他。
“算啦，過左去啦….. 唔好提啦。”
我看見他不願多講，也不去問了。 “咁既好男人你都捨得唔要， side 晒啦。”
“學你嘛， Dominic 弟弟。”
“咁你諗住點呀？要番家俊？”
“可能啦，唔知呀。”他說 “不過你可唔可以收留我一排先？”
“好彩我 daddy mammy 去左第二度做野，得我一個。佢地有排都唔會番，你可以住一排都 ok 。”
“有你呢個 Dominic 弟弟真係好。”
“不過 Jimmy 真係好男人喎，咁都飛…..”
“咁我覺得家俊會岩我掛？你係咪想要先？去馬囉…..”
“下……. 咁都得。”

之後我會便轉換話題，沒有再提起這件事。

家俊，能不能追回子行，看你的了………..

---

作者: 無名    時間: 2006-10-24 11:57

(17) 真心戀愛

我是文熙。

原來，世界上真的是有報應這回事的。

當初你對人怎樣，日後自然會有人以相同的態度來對待你，你遇不到不是代表沒有，可能只是尚未來臨而已。

老實說，最初我選擇了與子行一起，不是真心愛他的。某程度上說，追求他時，我可能是為了他的外表，為了那份新鮮感？又或者...... 可能是因為他很好騙吧？

而且，當我知道有家俊這個人的存在時，好勝心作祟，我告訴自己不可以輸給那一個沒有可能的人。只不過，到最後我卻因為子行對感情的這一份執著，而真心真意地愛上了他。

可能是報應來了，現在輪到子行他不愛我了，他卻跟我說仍然愛著那個人。為什麼我會輸給他？曾經我以為，跟子行一起，就像一個童話故事。不過，這個故事既不溫馨也不甜蜜，換來的只是傷感的結局。

難道家俊真的比我好？我不會知道，也許他好得可以有能力把子行搶回去，不過有時候我會懷疑，由始至終子行根本沒有喜歡過我，我一直都只是一個代替品。

玩弄人的，是終卻是被玩弄得最深。童話..... 結局是恐怖的。


酒吧內，人頭擁擁，燈光仍是這麼妖冶，彷彿在誘惑著那些尋觀的人，催眠他們，令他們忘掉一切。

文熙就坐在一個角落，拿著一杯 blue moon，正在看著一個與友人在傾談著的男孩。幾分鐘後，他決定走過去搭訕。

“你係咪 Oscar？係我呀，Jimmy 呀。”
“你係.........我好似唔識你架喎。”
“2003 年4 至 6 月，你記唔記得發生過咩事？”
“原來係你，果時你咪講得好清楚，話你冇愛過我，而家仲黎做咩呀？”
“可唔可以俾個機會我，去搵一個答案呀？”
“你想點呀？”
“我想知......真心愛一個人係咪咁易。”
“呢樣野唔關我事，你搵第二個啦。做咩要搵我呀？”
“因為你似........”文熙欲言又止。“我覺得我會鐘意你囉。我知你仲鐘意我架。”
“我鐘意邊個唔到你管。”
“你俾個機會我啦。”
“容乜易你忽然間又話你其實係玩我架？”
“我應承你我唔會架。”
“我唔知呀，呢樣野要睇你既誠意同造化啦。”

其實，我會選擇這個人，原因只有一個．．．．．．

總之，現在我會好好珍惜這一次機會，就當作是我為了從前的事作補償吧。

---

作者: 無名    時間: 2006-10-24 11:58

(1 8   )　時間.....逃避.......療傷？

我是 Oscar。

一切都是騙局，文熙口中雖說他是愛，到最後........

“Oscar，不如我地分開啦。”就在復合後的第三日。
“你又想點呀？”
“我話分手呀，你明唔明呀？”
“你點我係咩呀？話黎就黎話走就走。”
“對唔住，我根本冇愛過你。”

他丟低這一句，就頭也不回地走了。


我是文熙。

三天不夠，我已經發現，根本我對那個　Oscar 一點感情也沒有，他只不過是因為說話時的態度，笑的時候的那個表情看起來有點像子行外，根本沒有任何東西值得我去喜歡。

結論是：他只不過是一個短期代替品而己！過眼雲煙，存在時你不當是什麼一回事，消失時亦不會覺得可惜。

子行，子行。一天到晚腦海內只記掛著子行，他的身影，他的身態，他的一言一笑，一直都揮之不去。

總令人禁不住去找他.......
“子行.....”
“阿熙？你冇事丫嘛。”
“我.... 冇事，上次對唔住呀，我打左你一巴......”
“傻啦，係我唔0岩先架嘛..... 你唔好嬲我就真啦。”
“其實......我地仲.....會唔會有可能架？”
“Sorry.......我諗我真係唔可以........”
“點解？我愛果個偏偏唔愛我？但係d代替品又走晒出黎？”
“你唔好因為咁而做傻事呀....... 阿熙對唔住呀......”
“我明既......................”


時間，在某些時候一定是療傷的必要條件。而逃避，也許是治癒一段創傷的唯一方法吧！

得不到子行，文熙只好選擇逃避，也許是機綠巧合吧，剛好文熙的父親在加拿大病重，他一定要趕往當地探望，而且順便接手打理家人在當地的小餐館。今天，是文熙要離開香港的日子。在機場，他打了一個電話給子行。

“子行..... 我今日要離開香港啦，我有 d 事要去加拿大，可能幾年後先番。”
“點解你唔早 d 同我講呀？我黎送你嘛。”
“有d野我一直唔知點講....而家可以啦。”
“你講啦。”
“老實話俾你聽，一開始我唔係真心鐘意你架.......但係，之後我係全心全意，我諗你知架。唔知點解，我真係鐘意你架.... 因為你，我真正知道愛一個人係點，我唔想冇左你呀。不過，我知道.... 感情係唔可以勉強架，所以俾我衰仔 d，我逃避......”
“多謝你呀......”
“我唔同你講啦.....我走啦...... 或者我下次番黎，我可以令你從新愛我上我架....”
“可能啦..... 將來既事冇人知...... 總之時間一0岩，我地都可能仲得呢....點都好啦，你自己小心d啦。Bye！”
“再見啦，子行！”

「也許，總有一日，讓我從新愛上你。」

---

作者: 無名    時間: 2006-10-24 11:58

(19) 情人節生辰

我是 Dominic。

情人節，是戀人們黏在一起的一個節日，而生日，又是令一個興高采烈的日子，朋友們都會聚在一起，大家開開心心，快快樂樂。

但如果，失去情人，而且沒有朋友的情人節，又剛巧是你的生日，你又會有什麼感覺？十七歲時，第一次得到，知道什麼是愛，但同時亦嘗試到第一次失去。今天，我已經十八歲了，究竟還會發生什麼？

“Dominic，生日快樂啦。”說話的是 Kevin。
“多謝你呀。”
“點解你唔叫多d人一齊出黎陪你玩既？”
“我都冇乜朋友既，來來去去都係果幾個.....member friend得你同子行哥哥，本來今日叫埋佢出黎架，但係佢唔得閒，所以得番你咋.....辛苦你今日陪我啦。”
“見係你咋，第二個我都唔睬佢架啦。”
“多謝你囉.....係呢，我份生日禮物呢？”
“哈，睇你個樣幾貪心。好彩我都有準備到俾你，不過我冇拎出黎喎.....”
“搞錯，特登唔想送咋........”
“上黎我屋企拎啦，好唔好？”
“嘩！識你咁耐，你都冇俾過我上你屋企，而家無啦啦俾我上去，唔通你......”
“我咩呀？”
“收埋左d咩唔見得光既野呢？”
“........痴痴地。”
“呀.......你咁俾我上去，唔通你想送層樓俾我？”
“瘤就有一個，要唔要丫？想收禮物就行啦。”
“行咪行，怕你呀？”

到達Kevin的家，我才發現原來他家大得可以。正如廣告的一句“給我一個五星級的家！”正當我四處參觀的時候，他忽然叫我進他房內。

只見他的桌上就著一個包著的盒子，拆開一看，原來是一部手提攝錄機。還有一張紙，上寫著“情人節生日的你，現在獲得一個必會實現的願望”

“我真係可以？真係可以實現？我唔會客氣架喎！”
“你講啦，我唔知架。”
“上年，係我呢世仔經歷得最多野既一年，我遇到我既初戀，亦好清楚知道感情係乜野。之後，我連失戀既味道都知係點......我真係好唔開心。但係，我知如果我唔放棄，始終會得到一個更好架，我唔會灰心架！所以呢......我希望今年可以搵到一段真感情。”
“咁樣.....你叫我點幫你呀？”
“我夠知你幫我唔到啦，哈哈。我傻左發下up瘋之嘛。點都好啦，多謝你呀，我知好貴架呢份禮物，真係多謝你架。”

但Kevin 不理睬我，他只是開了攝錄機的重播鍵，之後他示意我看看那螢幕。只見他的樣子出現了並說“我係攝錄機精靈，記住，我唔係Kevin。佢咁死蠢梗係幫你唔到啦，不過我就唔同呢。你而家行去，打開第一個抽屜，就可以知道我賜俾你個情人係點架啦。”

我依言走過去，打開了抽屜，發現了有一本相簿。打開一看，發現第一頁是Kevin，而其他的則是我的照片。

我看著Kevin，呆了。只見螢光幕裡的他繼續說“知你會唔肯架啦，所以我比呢d證據你，等你知道Kevin 呢個死蠢其實鐘意左你好耐，你同佢影既每一張相，佢都有保留住架。”我看看那本相簿，發現全部照片的主角都是同一人───我。當中有不少是合照，我的單獨照，甚至有些是偷拍的，彷彿從每個角度，表情也被他拍過。

螢光幕內的人再說“F.4　果年，佢知道有你呢個人存在，已經鐘意左你，同你做朋友果陣，你唔覺得佢對你特別好架咩？咁多年佢都冇仔，你又知唔知點解呀？佢好憎你之前條仔，都好唔抵得點解佢會得到你，但係同時又令你傷心。不過佢諗深一層，如果你同你條仔好既，佢都會開心。”之後片段便完了。
“你傻架？咁講野.....講笑唔好咁玩嘛”我對他說。
“..........你覺得係.....講笑？”

大家默然不語。

過了得久，他說“樂呀.....”
“唔駛講啦，Kevin，你而家已經唔再係我個friend。”我打斷了他的說話。
他忽然從椅中跳起，捉著我說“點解呀？對唔住呀，我唔敢亂講啦，我地剁係做friend已經好夠架啦，唔好唔理我呀！”
“我都未講完，冇d耐性。你唔係我個friend呀，不過變左lover之嘛.....”
“真架？？？”
“唔想？收番囉！”
“唔好呀，我想架我想架。”
“但係.....你以後要對我好d，唔準恰我，錫晒我架！”
“得得得，你想點都得，我錫晒你呀！”接著他交給我兩條匙，說“屋就俾唔到你啦，但係我間房你以後都可以自出自入既///”
“嘩，好野，五星級的家呀。不過呢.....我想話你知，你d相好核突呀，你睇下，呢張合埋左眼，呢張似未訓醒，呢張仲衰.....個鼻孔都出埋黎啦....”我指著那些照片對他說。
“偷拍係咁架啦，唔滿意下次再影過晒好唔好？”
“梗係要啦，呢ｄ相你唔好俾人睇添呀,........咪住先，你偷影咁叻，仲有冇影其他靚仔架？等我搵下先。”
“梗係冇啦，我個心得你一個架咋！”
“算你啦！哈哈哈......我又乖又可愛又靚仔嘛...... wakakakaa”我滿足地大笑起來。
“你呀，快ｄ出去食生日蛋糕啦。你食完，今晚到我......”
“到你咩呀？”我問他。
“拆.....禮....物...嘻~”他在我耳邊輕聲地說。
“咦........死人咸濕佬！”

這是感動？還是隨便的選擇？

總之，十八歲的我，在生日當天，得到了我的第二次戀愛。生日願望實現了，現在真的擁有了一個全心全意去愛我的人。

---

作者: 無名    時間: 2006-10-24 11:59

(20) 大結局

我是家俊。

Dominic 還真多鬼主意。
“你呀，有咩好辦法 tum 番子行哥哥架？” 他又喝著他最愛的蜜瓜味奶昔。
“唉….. 有我就一早搞掂啦。”
“你呀，淨係坐係度有鬼用咩。”
“咁唔係我可以點喎？”
“拿，咪話我唔教你啦……..伸隻耳仔埋黎啦。”
我聽了之後也吃了一驚。 “咁,…. work 唔 work 架？”
“一定得，子行哥哥好易 tum 架咋。” 他一口氣把奶昔喝完。 “你記住，唔好以為我為你呀，我想子行哥哥開心咋。”
“得啦。”
“我呢條橋值唔值得你請我飲多杯先？” 他指著那隻空杯說。
“梗係得啦，成事既話我咩都得！”
“好野!!!! Waiter 唔該….”
看著他的臉，真不覺得他竟然是個可以很看得開的人。

----------------------------------------------------------------------------------------------------------------------------------------------------------------------

我是子行。

自從離開了阿熙的家後，我便再沒有見過他了，而我也一直住在 Dominic 的家。每天除了上班外，也照顧了這個小朋友的起居。而家俊跟阿熙也沒有再聯絡我，這也不錯，我也樂得清閒。

不過，我知道 Dominic 暗中有跟他們聯絡的。而且鬼鬼祟祟的，不知道這小子又在搞什麼鬼。

今天當我照常回家時，發現那小子不在。當我正在準備晚餐時，忽然間間鈴響了起來。我打開門，發現沒有人，但發現有一個包裹放在地上。我心想，那不會是炸彈吧？看真點，原來收件人是我，所以我把它帶了進屋。

當我打開了它後，我便立刻知道那是誰給我的。因為我不會忘記它，因為它，我跟阿熙熟絡，甚至拍拖。因為它，我始終也令家俊知道我的心意。它，是我送給家俊的那隻布偶。而它手上拿著一條鎖匙，它的背面寫了點字。

“子行 :
我知道你會很惱我，但我終於搞清楚，原來我是愛的是你。你拿著家中的門匙，帶著我們的布偶，快點回來吧！ “

“唉…… “我輕嘆一聲。



後記１ :

我是子行。

到最後我也沒有搬回去住，但亦沒有再住在 Dominic 的家。為什麼？

因為我現在跟我的愛人，黃家俊，一起住在剛入伙的新居。這是我們日後的家，我們想了很久才決定買的。因為我跟他也不想留在舊居，那裡實在有太多不愉快的回憶了。

究竟為什麼我會回到家俊身邊？記得那一天我收到包裹吧？拆了包裹後，電話響了起來。
“收到未呀？”
“我知係你送架。”
“咁你肯唔肯湊佢番黎先？”
“我唔想同你好似你以前果 d 咁呀，其實你俾唔到安全感我呀知唔知呀？”
“我知，但係我應承你，以後都唔會架啦。”
“我點知呀？”
“因為我決定左要你，你今日一定要跟我走架啦。”
“咁如果我唔走，咁你點呀？”
“訓街囉，你望下窗口。”
我看下去，發現他竟然在對面搭了個小帳篷，他看到我，還對我揮手。
“我唔跟你走呀，你住飽佢啦。”
“唔好呀…… 呀你等陣”
我隱約聽到有警察在盤問他，我急忙走到窗口看看，原來他的行為似乎驚動了一些住客，有人報了警。

我連忙趕下樓，向警察解釋。這個時候，Dominic 走了出來。
“sorry 呀警察叔叔，係我報案架，我地玩下架咋，我唔知佢係我個 friend 呀。對唔住呀。”
“細路，你知唔知咁我地可以拉你架。” 其中一個警員說。
“真係對唔住呀，叔叔我下次唔敢啦。” Dominic 又以一個天真無邪的臉孔說著，另外向我們吐一吐舌頭。
“今次睇在你細個，算啦。下次唔好咁啦下，不過我都要抄一抄低你地身份證。”
“知道叔叔。” Dominic 還拉著耳朵說。

那些警員抄下我們的資料後便走了。
我說 “係 Dominic 你搞鬼啦？而家冇事啦，我走啦！”
“子行哥哥呀，唔好走啦。”
“子行……” 家俊拉著我。 “既然你黎得，即係代表你仲關心我，唔好番上去啦。”
“唔得，我要番上去。” 我說。
“我仲要做咩先可以令你同我一齊呀？” 家俊問我。
“俾我上去換個衫，執番 d 行李都得掛？仲有，我唔想搬番去啦。”
“點解？”
“我想買一層樓。我想一個新既李子行同一個新既黃家俊一齊呀，以前 d 野一 d 都唔想記住。”
“得…..” ,家俊歡喜地說。
“仲有，而家我地仲有 d 野未做…..” 說著我已和家俊抱在一起。
一會兒後，我說 “唔係呢樣…….. “ 我們同時看著Dominic.。
“教訓佢…..” 我們一起叫著。
“救命呀，恩人都打，喂，唔好打面。非禮呀…….” Dominic 慘叫著。

後記２：

三年過去了，大家也能平安渡過。而家我們四人竟也能和平相處。

今天又到了Dominic 的生日，亦是一年一度的情人節。

“21 歲仔啦你今日，睇下你，一d都冇變過，仲係咁小朋友....”子行邊跟Dominic 說。
“車......我又有人錫又有仔，連錢都有仔俾啦，小朋友唔起咩？”Dominic舉起他今年的生日禮物───價值三千元的手錶說。
“咁串？推你出馬路先.....衰仔丫。”
“唔好呀.....老公救命。”Dominic向Kevin 求救。
“哈.....抵死丫，我救你唔到架喎。”Kevin幫理不幫親。
“家俊....你唔會唔救我既.......”Dominic轉移目標。
“哈.......我都幫你唔到，你子行哥哥最大架喎。”說罷他看著子行一笑。

在推撞間，忽然Dominic撞到一個途人。
“對唔住呀......咦？你係.......”
“熙？你幾時番黎架？做咩唔搵我地架？”子行已經搶先說出。

當家俊看清楚來人時，氣氛立刻緊張起來，他立刻搶到子行身前，裝出一副笑臉跟文熙說。“你呢幾年幾好嘛？我同我男朋友，子行一齊左三年，我地好開心，你又點呀？”
“我？幾好啦。係呢，你地去緊邊呀？”文熙努力地岔開話題。
“今日呢條0靚仔生日，同佢去食飯囉，你又點呀？”子行指著Dominic。
“冇......我去搵個朋友，留幾日又會再番加拿大架啦。”
“你.......冇野丫嘛？”
“傻啦，我有咩呀？哈，我約左我條仔咋，趕時間走先，走果日搵你啦，拜拜。”
“好呀，記住唔好好似果時咁粒聲唔出走左去呀。”
“一定啦！”

目送文熙走後，家俊按捺不住問子行“其實，你見番佢，仲有冇感覺架？”
沈默了一會，子行開腔“時間，可以消磨一切。”說罷便淡淡一笑。

「時間，可以消磨一切...................」

---

作者: 月天使    時間: 2006-10-24 21:38

這個故事唔錯!!
多謝你的分享~~

---

作者: 隨緣之人    時間: 2008-4-4 15:57


  有些字看不懂~~
但猜的出來~~
  文還可以~

---

作者: smva    時間: 2008-12-31 13:04

[發帖際遇]: smva向壇主說出恭賀說話,壇主送出現金171Ds幣.

好看
期待下篇作品

---

作者: doctrine    時間: 2010-2-27 22:53

感謝你的分享喔！！！

---

歡迎光臨 ☆夜玥論壇ק (http://ds-hk.net/)

Powered by Discuz! 6.0.0