標題: [星座命理] 咩星座會再見亦是朋友？ [打印本頁]

---

作者: vivianlau0810    時間: 2008-7-18 21:41     標題: 咩星座會再見亦是朋友？

[發帖際遇]: vivianlau0810贏了wii比賽冠軍，獲獎金現金100Ds幣.

咩星座會再見亦是朋友？


白羊座

分手之後會變成點就要睇下係你飛佢定佢飛你，如果係你飛佢在先呢，佢唔四圍唱衰你你都要偷笑；

如果佢飛你呢，你走得好好睇睇都好d…不過講到最尾，白羊座係一個只會向前望的人，

大家過去就過去，好難話做得返朋友，都係唔好奢望啦！




金牛座

金牛座一向性格溫和，係出曬名的和平主義者，就算大家真係要分手，響金牛座的腦海裡面，

佢都係只會盡量記住大家一齊時最開心的片段，所以無論分手的時候你有幾衰，你有幾賤，

金牛座都唔會對你產生太大的仇恨，更加唔會四圍唱你，甚至乎會想話做返朋友！




雙子座

講到雙子座呢，正如佢同你一齊時都唔係產生太多愛，所以響分手的時候呢佢都唔會產生太大的恨，

至於做唔做得返朋友就要睇下你份人本身有幾多價值啦，如果你響某方面有獨特的才能，

例如好叻電腦、識好多人，佢自然會好想繼續同你做朋友，因為佢知道總有用得著你的時候嘛！





巨蟹座

咪睇巨蟹座好似冇乜攻擊性就以為佢係最會同舊情人做得返朋友的星座，

其實巨蟹係好心水清同時亦好知自己要d乜，一旦大家關係轉變，佢就會即刻抽身唔會再用情人的態度對你，

同時佢亦都會為免傷害自己同對方而唔想再有任何瓜葛，除非對方真係好可憐引發佢的同情心啦！




獅子座

獅子面對過氣情人的態度好矛盾，其中係佢要保持皇者風範唔想大家分手之後咁肉酸，

其二係起碼大家都做過一場情侶，如果講到d前度咁衰咪即係代表佢冇眼光？

所以或多或少為表現自己的氣度同面子，獅子們表面上會扮曬大方，但背後真正有幾唔怨恨呢，就真係佢至知！




處女座

好多人就梗係以為對人有d刻薄的處女座一定係分手唔係朋友，係咁諗就大錯特錯，係無錯，

初初散分手時處女座係會四圍唱你仲要講到有幾衰有幾賤，不過當佢度氣過曬，

有機會的話佢又唔會介意同你約出去食下飯飲下茶傾下計，始終處女座其實暗地裡係個好鬼多情的人！


天秤座

無乜立場的天秤座會點對前度就要睇下對方點處理啦！如果對方再見亦是朋友的，

佢當然亦都抱有風度當大家做返朋友啦！但係一旦對方玩反面冇情，天秤多數會選擇搵班朋友出來聽佢哭訴，

一向優雅大方的天秤絕對唔鍾意玩埋d核突R爛面行為！




天蠍座

天蠍座分手之後有冇品就要睇下係你飛佢定佢飛你，如果係佢飛你咁就好好多，

佢會因為有dd的內疚而得閒會關心下你，再好d會幫你安排埋生活費咁，算叫做有d補償啦！

但係如果係你飛佢仲要係為第3者而飛佢，咁個情況就會差好遠，到時真係要同你講句自求多福！




人馬座

戀愛對人馬座來講係一個以佢做中心的遊戲，無論分手當時發生咩事，

只要經過一段時間佢的記憶系統就只會記住d好事，所以就算當時有幾嬲有幾憎恨，

但經過一段日子之後佢都唔多再記得，雖然講未必去到話要做返朋友果隻，最起碼唔會再嬲佢亦唔會埋怨囉！





山羊座

山羊座出曬名係現實派，佢連拍拖戀愛都係好鬼現實，如果你兩個分開時佢未有著落又或者佢要靠你供養，

佢點都會同你保持拉拉扯扯的關係，但係一旦佢轉頭已經搵到第二個可以完全代替你的存在呢，

你咪駛旨意再搵到佢，仲何況講話做朋友喎！最好以後見到咪見添呀！





水瓶座

理智行先的水瓶座分手做唔做得成朋友就要睇下雙方分手的理由同處理得靚唔靚啦！

如果大家分手時冇乜唔開心，咁水瓶會響覺得多個朋友都唔差的情況下同你做得返下朋友，

但係如果攪得好唔開心然後再搵返佢？佢真係睬你都傻，咪攪住曬添！





雙魚座

要睇再見係唔係朋友有分階段，響分手初期同中期階段，雙魚仲係有d放唔低兼未搵到第2個時，

佢多多少少主動被動都會同前度拉鋸住未斷得曬，不過一旦進入後期佢搵到第2個之後，

響物理上佢會完全唔再見前度好絕咁斬斷曬d關係，不過響精神上就會繼續八住對方d事！

---

歡迎光臨 ☆夜玥論壇ק (http://ds-hk.net/)

Powered by Discuz! 6.0.0