呢排天氣熱，成日聽到些人鬧交鬧到七晒彩！無計，天頭慶，脾氣比較暴躁，所以好多時都忍唔住就同人「片」過，「片」都最尾，你估咩人最多俾人鬧，咩人最鍾意鬧人，一睇你就知！
撩人者賤指數：
第一位：白羊座92%
火爆ｏ既白羊人，鬧交真係好有天份，總有ｏ野撩到出ｏ黎鬧，仲要鬧得ｏ黎要有道具配合，例如花樽、碗碟總之都會隨住鬧人ｏ既語句，一次過「車」埋人到，搞到人ｏ地嚴重傷亡，所以見到白羊人發脾氣時，請退避三舍，以免意外發生。
第二位：獅子座80%
衝口而出通常係你致命ｏ既原因！一睇到唔順眼，你就會亂ｏ黎，鬧ｏ左人先算，你可能講完就無事，但俾你鬧ｏ個個就己經狗血淋頭，絕無翻身之日！仲要你鬧人時絕不留口，最後只會俾人話你得把聲，記得改善！
第三位：水瓶座72%
一向幽默感重ｏ既你，講ｏ野有時都幾刻薄，成日羅人ｏ地ｏ既避忌ｏ黎當笑話講，你話幾乞人憎，仲要愈講愈興奮，直情口沬遮攔，駭鬼死人，！一句講晒，做人最好就係留有餘地，如果唔係橫屍街頭都唔知咩事！
第四位：雙子座65%
自命聰明絕頂，口齒伶俐ｏ既雙子人，最鍾意玩ｏ既就係急才，所以得罪人都唔知咩事，只係知道愈講愈興奮，愈講愈開心！知唔知你愈講，結果可能只會積怨愈深，所以記緊見好就收！唔好亂講ｏ野！
企定來鬧指數：
第一位：天蠍座 80%
以不變應萬變ｏ既天蠍人，最拿手就係「睇定ｏ的先！」，所以無論人ｏ地點樣鬧你，你都只會記晒上心！先人曰：「君子報仇，十年未晚！」咁樣鬧你，如果你唔記佢十年八年，你真係會同自己講，枉我係天蠍人呀！
第二位：處女座75%
面對鬧人場面，我講你知，你永遠係ｏ個個依依哦哦，唔知自己想講咩ｏ既人，最後你唯有企定定，無錢剩，俾人鬧到七晒彩！咁你就開心喇！知唔知衰咩，衰個腦唔轉得快咯，成日俾人食住就係咁解喇！
第三位：人馬座60%
你聽唔入耳，全因為人ｏ地講咩，你都只係當耳邊風，根本就唔會聽入耳度，所以人ｏ地點鬧你，你都只係笑一笑，然後咩都唔記得晒！再唔係就以「煩」功頂之！長長氣氣煩到你死！掉轉頭，可能煩到人ｏ地唔敢唔再鬧你添！
第四位：金牛座55%
金牛人ｏ既容忍到係全星座之冠，你可以忍無可忍，然後重新再忍，但忍到某一個程度，你會爆炸，而威力更加是無語倫比，所以比起之前ｏ既星座，你依然令人有危機感，都係第四位算喇！
以和為貴指數：
第一位：天秤座90%
做和事佬最出名ｏ既天秤人，你覺得人際關係係一件好重要ｏ既事，而一段段好ｏ既人際關係，係你一生都好想做ｏ既一回事！所以你見到人鬧交，無論關唔關你事，你都會插手，希望世界和平，但講真，好多時都會因為咁死得不明百白ｏ架，小心！
第二位：雙魚座87%
世界大同係你一世人ｏ既願望，出名富有同情心ｏ既你，最唔鍾意見到ｏ的人打打殺殺，所以見到人鬧交，你最鍾意息事平人，不過有時又會偏激得滯，變成姑息，咁落去只會令人覺得你懦弱，知道無？
第三位：巨蟹座82%
家和萬事興，家衰口不停，所以你好怕人ｏ地嘈交，一嘈你就心煩意亂，唔知點算好！所以人ｏ地踩到上心口，你都只會叫人唔好咁，而唔會同人「開拖」，屋企有個咁ｏ既和事佬，好多時真係可以化解到好多家庭糾紛！做社工最ｏ岩！
第四位：山羊座80%
唔鬧交唔係因為你唔想鬧，而係因為你覺得講多無謂，搵錢最實際！你無之前三個星座咁偉大，對你ｏ黎講，每個人都係朋友，都有機會搵錢，我做咩要搞到個個都係敵人，所以有咩勞氣，轉頭食ｏ左佢，正！
