白羊男
白羊男的專一係有分得手前同得手後，只要一日女方唔同佢一齊，佢都會好似中降頭咁死中個頭落去，但一旦得手，佢就會馬上由濃情轉淡，好快，好恐怖！
金牛男
金牛男對愛情慢熱，佢會花好長時間先可以投入一份感情之中，同樣地都要花番好長的時間先可以抽離份感情，所以要講專一，基本上冇人係佢對手，一面倒。
雙子男
同雙子男談戀愛要一早做好心理準備，佢有一千萬個理由同女友分手，除了因貪新忘舊之外，仲會因佢興趣多多而造就大量認識女仔的機會，最怪係連對方太好都係分手理由...
巨蟹男
巨蟹男談的戀愛太多顧慮，冇安全感又死，叻過佢又死，唔了解佢話佢屋企又死，再加上佢本身桃花唔差，所以巨蟹男響未真正投入前都會一心諗住試多幾個女仔，要佢專一？難囉！
獅子男
咪睇佢平日花花弗弗，又鍾意享受緋聞，有時對其他女仔口花花，但係獅子男對自己另一半又好鬼專心一意，就算佢響出面攪乜，都冇諗過分開，贏另外兩個火系成條街。
處女男
挑挑剔剔的處女男好了解自己的優勢，亦都明白自己要d咩女朋友，但係耐不耐都會想搵個更適合自己的，所以拖住自己女友之餘亦不忘攪下外遇，好麻煩。
天秤男
談戀愛係天秤男的嗜好，所以呢，好難令佢個心停響同一個人身上太耐，佢會將自己個心分成幾廿份，最大果份就放響女友度，再一小分一小分咁放響唔同的少女度！
天蠍男
佢的專一好另類，佢一旦拍拖唔會輕易講分開，但係呢，響佢個字典入面又將唔同女仔分成唔同地位，老婆還老婆，女朋友還女朋友，好騎呢！睇你個將「專一」點詮釋囉！
人馬男
表面好似好風流的人馬男，要專一好講佢女朋友係一個點樣的人，如果對方成日keep住對佢忽冷忽熱，佢就唔會變心，反而更加想征服對方，再加上人馬男太多嗜好，只要大家開心，佢就唔會諗分手。
山羊男
咪睇山羊男木口木面，其實佢對愛情有一番唔錯睇法，首先係佢知道自己吸引力差d，再加上本身掛住發圍，所以一旦開始佢就會好好珍惜呢份感情，唔會變心！
水瓶男
來自外星的水瓶男有自己一套思考邏輯，加上佢人生中有太多東西要攪，所以一旦鎖定對象，佢唔會再花心機攪心攪四，除非現役女友實在太難頂，不過始終都係淡淡地。
雙魚男
雙魚男天生浪漫，再加上人品唔錯，真命出現前難免女仔大把貨響手，同個個都曖曖昧昧咁，但一旦女神出現，佢只會貢奉住女神，其他女人完全唔會放響心，頂多望多兩眼。
